Премиерот Димитар Ковачевски по повод Денот на Републиката 2 Август, положи цвеќе на споменикот на слободата “Сила, слава и победа” на тврдина Кале во Скопје. Дел од делегацијата предводена од премиерот беа и вицепремиерите Артан Груби и Фатмир Битиќи.
„Крушевската Република траела само 10 дена, но била, е, и ќе биде симбол на државотворните стремежи на македонскиот народ и на македонската државност”, истакна Ковечевски во неговото обраќање.
Тој посочи дека длабоките демократски принципи на кои се засновала Крушевската Република изразени во Крушевскиот манифест кој јасно прокламира социјална, национална и верска еднаквост, не случајно денес се темелите на современа Република Северна Македонија.
“На Крушевската Република и АСНОМ се надоврзуваат Народното Собрание на тогашни Народна Република Македонија и Собранието на Социјалистичка Република Македонија, како основи на првото повеќепартиско Собрание на Република Македонија, денешно Собрание на Република Северна Македонија”, рече Ковачевски.
Премиерот додаде дека сите клучни одлуки за државата до денес се инспирирани од храброста на илинденците и асномците, со државничко постапување на Собранието.
Р.С