Властите го слушаат мислењето на стопанството, но во случајот за обвинувањата за данокот на солидарност тој смета дека нецелосно се прикажува сликата во јавноста, истакна вицепремиерот за економски прашања Фатмир Битиќи во вчерашното гостување на вестите на ТВ Сител.
„Данокот за солидарност таргетира 150 компании во државата. Тие што предале завршни сметки се над 43 илјади компании во државата. Овие 150 компании имаат услови при аплицирањето на данокот. Овие компании во криза, успеале да направат профит поголем од 20%. Таа разлика ќе оданочува со дополнителна стапка на данок. Тоа е солидарност“, посочи Битиќи.
Вицепремиерот додаде дека данокот доцни, бидеќи решението било блокирано повеќе од шест месеци во Собранието.
„Се блокира сè што е добро за граѓаните. Отприлика тоа се 50 милиони евра, но се уште се прават проценки. Тие пари ќе завршат за антикризните мерки, односно за потребите на граѓаните“, рече Битиќи.
Во однос на намената на собраните средства, тој како пример посочи дека парите може да се искористат за субвенцијата на електричната енергија, која ја користат сите граѓани.
„За време на кризите одредени компании премногу профитираа и овој данок нема да ја загрози предвидливоста“, смета вицепремиерот Битиќи.
Р.С
