More

    Спасовски: Бонус плата за вработени во МВР за остварени над 150 часа прекувремена работа за 2022 година

    Денеска се исплаќа бонус плата за вработени во МВР коишто оствариле над 150 часа прекувремена работа на годишно ниво за 2022 година, информираше министерот за внатрешни работи, Оливер Спасовски, преку неговата официјална ФБ страница.
    „Откако го преземав раководењето со МВР, како приоритет се воспостави редовната исплата на бонус плати за над 150 изработени часови прекувремена работа на годишно ниво, како гарантирано право на вработените во МВР согласно Колективниот договор“, посочува Спасовски во објавата.
    Во периодот од 2017 до 2022 исплатени се бонус платите за 2017 и 2018, за коишто не беа обезбедени и исплатени средства од претходното раководство на МВР, а продолживме и со редовна исплата на бонус платите за 2019, 2020 и 2021 година, за што вкупно беа обезбедени и издвоени 561.773.133 денари или 9.060.857 евра, средства од Буџетот на МВР предвидени за остварување на ова право на вработените, информираше Спасовски. Според него, благодарение на спроведените одговорни економски политики и како резултат на домаќинското работење, беше зголемена просечната плата, а со тоа растеше и поединечниот износ на бонус платите во МВР.
    „Колку за илустрација, ако бонус платата во 2017 година поединечно изнесуваше 22.928 денари, во 2023 година можеме да се пофалиме со бонус плата за 2022 година во поединечен износ од 31.859 денари, што претставува зголемување на износот од безмалку 40%. За ова раководство на МВР императив е подобрувањето на статусот на вработените во МВР, а во насока на нашиот концепт „Задоволна полиција – безбедни граѓани”, бидејќи веќе покажавме одлични резултати во гарантирање на безбедноста на граѓаните и државата и во борбата против секаков вид криминал“, се вели во соопштението на официјалната ФБ страница на министерот Спасовски.
    Exit mobile version