More

    Почна средбата на Ковачевски со лидерите од владината коалиција, првпат без Гаши и Трајанов

    Во Клубот на пратеници почна средбата на премиерот Димитар Ковачевски со лидерите од владината коалиција, на која се очекува да ги информира за посетата на САД, искажаната поддршка за земјава и реформите за продолжување на европскиот пат.

    На средбата присутни се лидерите на ДУИ Али Ахмети, ЛДП, Моника Зајкова, на ДОМ, Маја Морачанин, потпретседателката на Алијанса за Албанците, Бујаре Абази, како и Стојанче Ангелов од „Достоинство“, Мендух Тачи од ДПА и Љупчо Балковски од ВМРО-Народна.

    Во пресрет на средбата Централниот одбор на СДСМ синоќа ги повика сите политички и општествени чинители на обединување околу европската иднина и продолжување на европскиот пат.

    ЦО на седницата го задолжил Ковачевски да ги спроведе сите неопходни разговори и чекори, за Северна Македонија да го продолжи европскиот пат, информираше портпаролката Богданка Кузеска.

    Ковачевски пред Централниот одбор порачал дека од национален, регионален и глобален контекст е значајно продолжувањето на европскиот пат на земјата и ги потенцирал ризиците за иднината на земјата доколку не продолжат евро-интеграциите.

    -Можеби ВМРО ДПМНЕ ќе соберат капацитет за да можат да го согледаат сето ова како целина. Иако, до денес како дел од анти европскиот блок предводен од проруската Левица и со константно блокирање, јасно е како е позиционирана оваа партија. Но од друга страна, јасно е дека во ВМРО-ДПМНЕ има поединци, пратеници, претставници на раководството кои не мислат како Мицкоски и кои искрено, од срце сакаат земјава да го продолжи патот кон ЕУ. Сакаат да бидат дел од проевропскиот блок. И тие поединци мислам дека многу брзо ќе го остават Мицковски на последната станица и ќе продолжат на возот кон Европа. СДСМ е предводник на овој европски концепт за европска иднина. И тоа така ќе биде. Или ВМРО ДПМНЕ ќе се приклучи кон проевропскиот блок цела, или во делови. Во секој случај, возот е тргнат и враќање назад нема.  Сум го кажал ова, и ќе го кажам пак, Северна Македонија ќе оди напред и ние ќе ја исполниме нашата стратешка цел – полноправно членство во ЕУ, рекол Ковачевски.

    На денешната лидерска средба, за разлика од претходната, ќе присуствува претседателот на Алијансата, Арбен Таравари, а нема да учествуваат претседателот на Алтернативата, Африм Гаши, и претседателот на Демократскиот сојуз, Павле Трајанов, кои излегоа од Владата.

    (Извор: 24инфо)

    Exit mobile version