„Сè уште е во тек постапката чија динамика беше успорена поради ревидирање, кое следеше по разрешувањето на Златко Перински. За исходот од постапките благовремено ќе ве известиме“, одговорија од Град Скопје, на прашањето на ЦИВИЛ Медиа кога може да се очекува потпишувањето на договорот за Пречистителна станица Скопје и на што се должи одолговлекувањето на целиот процес.
Прочистителната станица Скопје по распишување на тендерот во јуни 2020 година, се очекуваше да биде завршена до 2030 година. Со третман на отпадни води во 9 општини во Скопје, треба да се опслужат над 500.000 жители, да се намали загадувањето на реката Вардар и да се зголеми отпорноста на градот при екстремни временски непогоди со зајакнувањето на самиот третман на отпадните води.
Обезбедувањето на финансии и потпишување на договорот за пречистителната станица се случи во декември 2019 година, кога Министерството за финансии потпиша договор за 136 милиони евра со Европската инвестициска банка (ЕИБ) и со Европската банка за обнова и развој (ЕБРД). Дополнително државата доби грант од ЕИБ во износ од 10 милиони евра.
Одговор на прашањето доставено до градоначалничката Данела Арсовска, го поставивме и на Генерален директор на ЈП Водовод и канализација – Скопје, Драган Илиевски, од кого не добивме одговор. Илевски доаѓа на местото на разрешениот Златко Перински, поради што се одложила постапката.
Токму неговото разрешување беше причина за кавга меѓу Арсовска и ВМРО-ДПМНЕ, што освен исходот од изградбата на пречистителната станица, Градот го чинеа и стопирање на ред други проекти.
Причината за разрешувањето на Перински, како што изјави тога Арсовска беше дека тој постапувал несоодветно во постапката во избор на изведувач на проектот по распишувањето на тендерот, обвиненија што Перински ги отфрли.
Според информации кои ги објави минатата недела сдк.мк, постапката е завршена и нема причина за кочење на процесот на изградба на пречистителната станица. Изворите на медиумот потврдуваат и дека изборот на фирма-надзор е завршен, договорот за надзор е потпишан, извборот на фирмата што ќе ја гради пречистителната станица е завршен, но Илиевски не го потпишува. Замерки немаат ниту банките финансиери.
Перински е разрешен во септември 2022. Прашањето што јавно го поставува редакцијата до градоначалничката Данела Арсовска, и генералниот директор на ЈП „Водовод и канализација“, што всушност се ревидира и колку време уште е потребно за ревидирање и ако се точни обвинувањата што беа посочени јавно, зошто на истиот начин не се постават и доказите. Зошто се прибегнува, на штета на граѓаните, на одбегнување на прашањето за судбината на Пречистителната станица Скопје? Оттаму, чии „рачиња се во медот“?
И покрај фактот што финансиска полиција влезе во ЈП „Водовод и канализација“, веднаш по разрешувањето на Перински, сепак, официјален одговор за нерегуларности, околу спорната пречистителна станица, нема.
Во очекување на одговор, што губат скопјани, но и граѓаните во целост, доколку евентуално се одложи или стопира проектот за Пречистителна станица Скопје?
Според планот се предвидува проектот да се одвива во две фази. Во првата фаза , до 2030 година треба да функционира една единица за подтретман и една за биолошки третман на отпадните води. До 2045 година треба да се заврши и надоградбата за отстранување на фосфорот и азотот. Дополнително постои можност во втората фаза да се изградат и единици за дезинфекција и третирање на атмосферски води.
Придобивките се взаемно и за заштита на животната средина и екосистемот на реката Вардар, како и за здравјето на жителите на град Скопје. Освен што ќе придонесе за отворање на нови работни места, ќе придонесе и за почисто и поздраво живеење во главниот град, подобрување на статусот на површинските и подземните води.
Пречистителната станица треба да се гради во Трубарево, Општина Гази Баба, треба да ги пречистува отпадните, фекални и канализациски води и како такви да се пуштаат во Вардар, во меѓувреме да опслужат над 500.000 жители во Скопје, но и сите што живеат по течението на реката Вардар.
Б. Јордановска/ Грин ЦИВИЛ
Извор:civilmedia.mk
