Саемите се настани кои се наметнуваат како неопходност доколку некоја компанија има планови за развој и стратегија за пласман на производите на странските пазари. Или, не можете да бидете надвор од овој свет, ако планирате да бидете дел од европскиот и светскиот пазар.
Во таа смисла, Фруит Логистика го има достигнато врвот, престижен саем по обем, посетеност, креативност на штандови, професионални претставници на компании, цели хали како слика на одредена држава и гордост во претставувањето.
Годинава во Берлин, Германија, од 8 до 10 февруари 2023 година семот вклучи седум платформи за презентација на производи: свежо овошје и зеленчук, јаткасти плодови, сушено овошје, цвеќиња, билки, замрзнато овошје и зеленчук и органски производи. На посетителите им се понуди широк спектар на производи и настани како што се „Innovation Award FLIA“, „Start-up Day“, „Tech Stage“, „Logistics Hub“, „Future Lab“ и „Fresh Produce Forum“.
FRUIT LOGISTICA во Берлин дефинитивно е најдобриот саем кога се работи за овошје и зеленчук. Највлијателен за реализирање на идни соработки, освојување на нови пазари и понуда на новитети. Оттука, поддршката од МЗШВ за национален штанд на овој престижен саем има уште поголемо значење.
Секоја чест и за ангажманот на тимот од Швајцарскиот Проект ИМЕ – програма за зголемување на пазарната вработливост, кои сите денови додека се одржуваше саемот се ангажираa во обезбедување на контакти со сериозни компании кои ги поканија на штандот и обезбедија директни контакти со нашите стопанственици.
Убаво беше да се види големата заинтересираност од страна на посетителите на нашиот национален штанд. Се бараше место повеќе да се седне на иста маса со водечките компании во овој сектор кои беа заинтересирани за соработка.
Компаниите Хортена, Виториа Фруит, Флора Фреш, Туран, Фреш Лине Компани, и Румко ги презентираа своите производи пред голем број на потенцијални купувачи, претставници на ланци на супермаркети од ЕУ и светот, како и увозници и дистрибутери за свежо овошје и зеленчук. За време на саемот, на националниот штанд присуствуваа и Државниот секретар за земјоделство, шумарство и водостопанство Реџаил Исмаили и директорот на јавното претпријатие Агро Берза Ниметула Рамадани. Тие дадоа целосна поддршка и заедно со стопанствениците ги дискутираа можностите за унапредување на секторот и уште поуспешен заеднички настап на пазарите во иднина. Македонскиот штанд на Фрут логистика го посети и В.Д. Амбасадорот на Република Северна Македонија во Сојузна Република Германија, Васил Грков.
Охрабрувачки беше да се види како знаеме и можеме да делуваме заеднички во поддршката на македонските агрокомпании, оти нивната успешна работа е успех за целата држава.
Фруит Логистика по сите параметри го оправда статусот за водечки саем.
Во продолжение оставаме преку фотографиите сами да го „прошетате“ саемот… има што да се види.
Извор: agrotim.mk
