Трет месец по ред Македонија е мета на лажни дојави за бомби, граѓаните се преплашени, учениците губат настава, а Ковачевски, Пендаровски и Спасовски убедуваат дека безбедноста на граѓаните е на високо ниво, соопштија од ВМРО-ДПМНЕ.
„Секој ден има нови пријави за бомби а Спасовски и МВР не можат да откријат кој стои зад овие дојави. Само што не им влегле во трагата, но решенија до ден денешен нема. Граѓаните живеат во страв и паника. Спасовски е целосно изгубен и неспособен да се справи со целата ситуација. Спасовски на 16 ноември изјави дека во истрагата се вклучени НАТО, Европол и Интерпол, за на крај да излезе дека Македонија дури после еден месец односно 16 декември ги информира НАТО структурите за секојдневните дојави за поставени бомби низ основните и средни училишта, Народната банка, Трговски центри, станбени згради, скопскиот аеродром, хотели и спортски центри, па дури и полициски станици“, се вели во соопштението на опозициската партија.
Според нив, несериозни се изјавите на Спасовски дека ова не се случува само во Македонија, туку и во другите земји од регионот и дека овој хибриден напад е само да предизвикување на страв и паника и да ја подрива политичката власт во државата.
ВМРО ДПМНЕ смета дека Спасовски и МВР не се грижат за безбедноста на граѓаните, а најдобар пример за тоа е што МВР се претвори во партиска полиција. Од оваа партија повикуваат „Спасовски да не го окупира МВР, и веднаш да си поднесе оставка. Македонија и граѓаните немаат веќе ниту ден повеќе за губење со оваа неспособна влада“.
Ако Спасовски не сака да си поднесе оставка, тие бараат премиерот Ковачевски веднаш да го разреши.
Не дозволиво е интересот на еден човек да биде пред интересот и безбедноста на државата. Граѓаните се преплашени, и се чувствуваат небезбедни и несигурни во сопствената држава“, се вели во соопштението.
