Руското Министерство за правда поднесе тужба за затворање на Московската хелсиншка група, една од најстарите руски организации за човекови права, објавено е на веб-страницата на московскиот суд. Групата, која објавува годишен извештај за состојбата со човековите права во Русија, во соопштение извести и за иницираното барање за распуштање и забрана на активности на територијата на Русија.
Засега не е познато на која основа властите сакаат да ја затворат, но порталот Новаја Газета објави дека таквиот потег е резултат на ненајавена проверка на активностите на организацијата нарачана од државните обвинители. Според соопштението, невладината организација била обвинета дека спроведувала активности надвор од московскиот регион, со што го нарушува нејзиниот регионален статус, особено испраќање набљудувачи на судења или нејзини членови на настани во други делови на земјата.
Барањето е поднесено денеска и се испитува, потврди портпаролка на градскиот суд во Москва, цитирана од новинската агенција Интерфакс. Организацијата се откажа од странско финансирање во 2012 година за да избегне да биде означена како „странски агент“, според законот што го отежнува работењето на организациите што добиваат странски средства.
Московската хелсиншка група е основана во 1976 година од тим советски дисиденти, научници и активисти за човекови права за да надгледува дали Советскиот Сојуз го почитува договорот Исток-Запад за воведување период на деескалација.
Од 1996 година до нејзината смрт во 2018 година, познатата советска и руска заштитничка на човековите права Људмила Алексејева со децении претседаваше со организацијата во Русија. Постапката против Московската хелсиншка група потсетува на онаа што минатата зима доведе до распуштање на невладината организација Меморијал, уште еден столб на одбраната на човековите права и споменот на жртвите на советските злосторства.
Во последниве месеци, режимот на Владимир Путин ја забрза репресијата против своите критичари, по офанзивата на Кремљ во Украина. На тој начин властите воведоа закон кој предвидува затворска казна до 15 години за секое објавување на информации за руската армија кои се сметаат за „лажни“. Повеќето опозиционери сега се наоѓаат во егзил или во затвор.
(Извор: CIVILMEDIA)
