дома блог страница 3

(ВИДЕО) Неконтролиран руски ракетен напад од пат полн со цивилни возила; Русите стравуваат од одмазда

Во ова видео, неконтролиран ракетен напад од руска територија е насочен кон Харкив, Украина. MLRS (Multiple Launch Rocket System) GRAD нагло го прекинува густиот цивилен сообраќај и почнува да истрелува проектили кон Харкив.

YouTube player

Видеото е добиено од анонимен руски државјанин кој изразил страв од одмазда од украинска страна.

Извор: ЦивилМедиа

Три причини заради кои доларот не може да биде симнат од тронот

0

Напорите за дедоларизација нема да направат многу за симнување од тронот на доларот, велат од мулѕинационалната инвестициска банка „Морган Стенли“. Во овој момент нема вистински алтернативи за дедоларизација на американскиот долар, велат стратезите на „Морган Стенли“ и наведуваат три причини зошто стравувањата од дедоларизација се неосновани.

Преземено од Бизнис Инсајдер

Статусот на доларот како главна валута на централните банки и за меѓународната трговија нема да се промени, соопштуваат од „Морган Стенли“.

Инвестициската банка ги анализираше стравувањата дека американскиот долар би можел да биде симнат од тронот како врвна и најкористена валута во светот. Ривалите како кинескиот јуан, јапонскиот јен или заедничката валута БРИКС, можат да влијаат на статистиката на доларот, предупредуваат некои коментатори, но од „Морган Стенли“ велат дека има три клучни причини зошто доминацијата на доларот нема да исчезне наскоро.

„Која валута би сакале да ја поседувате кога глобалните берзи ќе почнат да паѓаат, а глобалната економија се стреми кон рецесија? Сакате да се позиционирате во американски долари бидејќи тоа историски била реакцијата на девизниот курс на таквите настани“, укажува Џејмс Лорд, шеф на банката за девизна стратегија за пазарите во развој.

„Во крајна линија, Кралот Долар навистина нема никакви предизвикувачи“, додаде Мајкл Зезас, шеф на одделот за истражување на јавната политика на „Морган Стенли“.

Од банката „Морган Стенли“ посочуваат на три фактори кои ќе го задржат статусот на доларот на врвот на финансиските пазари:

1. Јуанот не е доволно ликвиден за да го предизвика доларот

Кинескиот јуан, кој властите во Пекинг се обидуваа(т) да го позиционираат како предизвикувач на доларот на светската сцена, не е доволно ликвиден за вистински да ја наруши доминацијата на зелената банкнота, велат стратезите. Тоа делумно се должи на строгите контроли на капиталот што Кина ги има на својата валута, кои го ограничуваат износот на готовина што може да се земе во и надвор од земјата.

„Изгледа дека е малку веројатно дека наскоро значајно ќе го оспори американскиот долар. За да го стори тоа, мислиме дека Кина ќе треба да ја олабави контролата врз својата валута и да ја отвори капиталната сметка. Се чини дека не е веројатно дека Пекинг ќе сака да го стори тоа во скоро време“, посочува Џејмс Лорд од „Морган Стенли“.

На ова прашања, исто така, влијае и кинеската економија, со оглед на намалената побарувачка на потрошувачите и тековната криза со недвижнини во таа земја.

„Кина може да постигне одреден напредок во деноминацијата на нејзината билатерална трговија во американски долари, но влијанието на доларот што го има врз глобална метрика останува и понатаму доминантно“, додава Џејмс Лорд.

2. Американскиот долг нема да влијае на доларот

„Пророците“ на падот на доларот велат дека довербата во зелената банкнота слабее бидејќи се зголемува загриженоста за зголемениот долг на САД. Од оваа година, долгот на САД достигна над 34 трилиони долари.

Сепак, тоа има мало влијание врз довербата во американскиот долар, со оглед на долгогодишната репутација на валутата како високоликвидно безбедно средство.

„Ја разбирам загриженоста, но во догледна иднина, нема ништо тоа“, вели Зезас. „Во зависност од исходот на изборите во САД, има одредена фискална експанзија на маса, но тоа не е екстремно според нас, и освен ако не мислиме дека во Централната банка на САД (FED) не можat да се бори против инфлацијата – a нашите економисти дефинитивно мислат дека можат – тогаш е тешко да се види тренд дека доларот ќе стане нестабилна валута“.

Инфлацијата драстично падна од највисоките нивоа од 2022 година, и покрај трошењето во ерата на пандемијата и зголемените нивоа на долг. Потрошувачките цени пораснаа само за 3,5% на годишно ниво во март, според најновиот извештај за инфлацијата, што е намалување од врвот од 9,1% пред неколку години.

3. Крипто валутите не се остварлива алтернатива

Иако криптовалутите како биткоинот се ликвидни, тие се премногу нестабилни за да се сметаат за вистинска алтернатива на доларот, велат стратезите.

„Ако имам крипто монета што расте, да речеме, 10% месечно, помала е веројатноста да ја користам за трговија и наместо тоа само да ја чувам во мојот паричник за да имам корист од растот на нејзина вредност“, вели Дејвид Адамс, од „Морган Стенли“, шеф на одделот за стратегии во однос на G10, односно на десетте најсериозни валути за трговија во светот.

„Разумните луѓе можат да не се согласуваат околу тоа дали криптовалутите ќе поскапуваат или ќе поевтинуваат, но јас би тврдел дека најдобриот исход за доминантна валута не е ниту едното ниту другото“, посочува Адамс.

И Други економски експерти, исто така, ја отфрлија можноста доларот да биде симнат од неговиот трон во скоро време. Тое не е невозможно, велат во Бизнис Инсајдер во оваа анализа, но, за деноминацијата на една валута се потребни многу децении додека друга валута се препознае како безбедна, а доларот секако нема да „седи“ со скрстени раце.

Извор: Рацин

Внимание: Матурантите со поделени мислења во однос на полагањето на државната матура

По повод матурските прослави, но и по матурски испити и матурски концерти, екипата на „Внимание“ ги прашува матурантите – дали матурските прослави денес се потреба или луксуз?

Мислењата на матурантите се поделени, исто како и во однос на прашањето дали треба да се полага државна матура. Некои сметаат дека матурските прослави се луксуз, други потреба. Некои сметаат дека државната матура не треба да се полага („искрено ќе кажам „не“, бидејќи е голем стрес – вели една матурантка“), други дека е неопходна („реалноста е дека оценките се ставаат со врски, а не со знаење“ – како што вели друг матурант).

Повеќето испитаници субвенции за матуранти и полуматуранти се добра идеја. Најтешко прашање за матурантите беше – Како вие би ги мотивирале другите матуранти да останат да студираат или да работат во Македонија? Неколку матуранти воопшто не беа ниту мотивирани, ниту пак мотиватори за студирање или работа во Македонија: „Би ги мотивирал да си одат, на пример, начинот на живот тука е многу подобар, ама парите што се прават во странство се неспоредливи“; „Да најдат работа тоа што им се свиѓа, да дадат се од себе да може да се опстане овде, да се работи со добра плата и овде“, велат матурантите.

Анкетата „Внимание, внимание – зборуваат граѓаните“, се емитува на каналите на „Трн“ (на Фејсбук, YouTube, и на Инстаграм) и нејзината цел е да се чуе гласот на граѓаните, посебно на младите. Гласот на граѓаните нѝ го претставува артистот Дениз Абдула, а продукцијата е на „Трн.мк“.

 

Извор: ТРН

 

Муратов: Дезинформациите доаѓаат на емотивно ниво, затоа се успешни

„Во принцип дезинформациите и трол фабриките работат на емотивно ниво. Те фаќаат на емоции. Друго е кога ќе прикажам фотографија од дете што плаче, не јаде и кажам дека тоа е поради одредена политичка структура. Кога имаш такви моменти и емоции ја забораваш вистината“ рече уредникот на Цивил Медиа, Дехран Муратов во утринската програма на „Слободен печат“.

Тој додаде дека во такви моменти граѓаните не мислат на вистината, туку реагираат на емоции по што се шири таа дезинформација и пропаганда.

„Најлоша е полувистината во целото море на дезинформации“ рече Муратов.

Тој додаде дека доста такви дезинформации се споделуваат на контактните емисии на телевизиите, но и на дебатите, каде што некој од соговорниците знае да каже невистина, а водителот во моментот да не знае да ја демантира, по што таа се шири.

„Ако човекот кој ја кажал е од некоја политичка партија и каже некоја лага или дезинформација, неговите трол фабрики потоа ќе го шират тоа, често и со спонзорирани објави за тоа да стигне до поголема публика“ рече Муратов.

Извор: СлободенПечат

Теми на денот: Закани и насилство врз судии, директори, и странски политичари

Главни медиумски теми на 15 мај беа заканите кон претседателката на Уставниот суд, опожарениот службен автомобил на директорот на затворот Идризово, како и атентатот врз словачкиот премиер.

ТВ Телма ги спои првите два настана во насловот „Претседателката на Уставен суд пријави нож и импровизран кревет до нејзиното возило, опожарено и возилото на директорот на Идризово“, укажувајќи дека „директорот на Идризово и судијката Кацарска ги поврзува предметот 27 април за учесниците во насилствата во Собранието.

Кацарска го судеше предметот, додека Јовановски беше дел од поротата.“

Во попладневните часови, на агрегаторите за вести доминираа наслови за обидот за атентат врз словачкиот премиер, како и бројните реакции со осуда на чинот.

 

 

Анкета на ИРИ: Се намалува поддршката за ЕУ, се зголемува антизападното расположение

Пишува: ЖАРКО ТРАЈАНОСКИ

Наспроти пораките во дел од медиумите за „Силна поддршка за ЕУ“ од 68%, резултатите од најновата анкета на ИРИ за Северна Македонија укажуваат дека поддршката за ЕУ во земјава е значително намалена во споредба со март 2006 (97%) или ноември 2021 (84%).

Во анкетата на ИРИ има и други показатели кои предупредуваат на намалена поддршка не само кон ЕУ, туку и кон Западот, односно за зголемено антизападно расположение во Северна Македонија.

Еден од индикаторите за зголемено антизападно расположение во Северна Македонија е и перцепцијата на Бугарија, земја членка на ЕУ и НАТО, како најголема закана, наспроти перцепцијата на Србија како најголем сојузник (каде што, според резултатите на анкетата, Путин ужива најголема поддршка од 80%, Русија се смета за најголем сојузник од 46%, а САД се сметаат за најголема закана од 36%).

Има ли „силна поддршка за ЕУ“ во анкетата на ИРИ?

Најновата анкета на ИРИ за земјите од Западен Балкан привлече поголемо медиумско внимание на 14 мај 2024 година, a истата беше и „тема на денот“ во вестите на ТВ Сител, каде што гостуваше претставничката на ИРИ, Илина Мангова.

Една од главните пораки во медиумските наслови беше „За членство во ЕУ се 68% од македонските граѓани“, проследена со пораки во други наслови за „Силна поддршка за ЕУ“.

 

Но, претставничката на ИРИ во гостувањето на ТВ Сител укажа на пад на поддршката за членство во ЕУ во земјава, во споредба со годините кога таа поддршка изнесувала многу повеќе, спомнувајќи дури и 90% поддршка од некои поранешни истражувања (на пример, во периодот од 2006-2009 поддршката за ЕУ во анкетите на ИРИ се движи од 92% до 97%).

Ако се погледне и графиконот со процентите на поддршка за членство ЕУ од 2010 до 2022, тогаш пораката за „Силна поддршка за ЕУ“ може да се протолкува како порака истргната од контекст – затоа што не го зема предвид забележителниот пад на поддршката, во споредба со март 2006 (97%) или ноември 2021 (84%).

Поддршката за членство во ЕУ во анкетите на ИРИ од 2010-2022

                        Поддршката за членство во ЕУ во анкетите на ИРИ од 2010-2022

 

Освен тоа, медиумските пораки и наслови за „Силна поддршка за ЕУ“ не го земаа предвид ниту изразениот сомнеж во однос на намерите на ЕУ, регистриран во одговорите на испитаниците на посебното прашање во анкетата на ИРИ – Дали ЕУ е сериозна во своите намери да им понуди членство на државите од Западен Балкан?

 

Од друга страна, овој јасно изразен сомнеж е земен предвид во пораките од насловот на ТВ Сител: „Македонците сакаат во ЕУ, но не веруваат дека Унијата ќе ги отвори вратите“, првичниот наслов на DW: „ИРИ: Северна Македонија сака во Европа, но не ѝ верува доволно на ЕУ“, и насловот на Слободен печат: „Анкета на ИРИ: Граѓаните поддржуваат влез во ЕУ, но сметаат дека Унијата не е сериозна во намерите да понуди членство“.

Впрочем, и од споредбата на сегашните одговори на прашањето дали ЕУ е сериозна во своите намери да им понуди членство на државите од Западен Балкан, со одговорите од 2022 година, може да се согледа пад од 8% на оние кои одговориле со „да“, и раст од 3% на оние кои одговориле со „не“.

Дека поддршката за ЕУ од 68% не е толку силна како во минатото, се потврдува и во насловот на Призма: „Анкета на ИРИ – мала доверба во политичарите, во институциите и во ЕУ“. А скептичноста во однос на ЕУ како приоритет е индикативно регистрирана во насловот на Сдк.мк: „Врвни приоритети на владата треба да бидат високите цени и корупцијата, ЕУ интеграциите на последно место, покажа анкета на ИРИ“, како и во прилогот на  ТВ Алфа: „Во однос на Европската унија и интеграцијата на Македонија, само еден отсто од граѓаните рекле дека тоа треба да биде приоритет.“ (ИСТРАЖУВАЊЕ НА ИРИ: Врвни приоритети на Владата да бидат инфлацијата и корупцијата).

Има ли други показатели за антизападно расположение во анкетата на ИРИ?

Во анкетата на ИРИ можат да се наведат неколку интересни показатели за сериозни анти-ЕУ и антизападни влијанија во Северна Македонија:

  • Забележителен е падот од 10% на испитаниците (од 41% во 2022 на 31% во 2024 година), на тие што сметаат дека надворешната политика на нашата земја треба да биде само про-ЕУ и прозападна. Така, Северна Македонија е единствена земја покрај Србија во која прозападниот курс нема 50% поддршка (има само 43%, заедно со тие 12% што сметаат дека курсот треба да биде прозападен, со зачувување на односите со Русија).

 

  • Податоците од анкетата на ИРИ од септември-октомври 2022 укажуваат дека за исклучиво про-ЕУ и прозападен курс тогаш биле дури 47% од испитаниците, што значи дека падот е уште поголем. Односно, падот од септември-октомври 2022 до февруари-март 2024 е дури за 16% (од 47% на 31% за исклучиво про-ЕУ и Западен курс), односно од 73% на 43%, на збирниот прозападен курс.

  • Забележително е дека само во Србија и Северна Македонија има повеќе испитаници кои ја подржуваат Русија, отколку Украина (како страни во воениот конфликт).

  • Забележително е дека само во Србија и Северна Македонија повеќе испитаници сметаат дека Западот е најодговорен за воениот конфликт помеѓу Русија и Украина, отколку што сметаат дека е најодговорна е Русија.

Сумирано, одговорите на овие три прашања од анкетата на ИРИ сугерираат дека по големиот пад кај нас, нема мнозинство за прозападен курс во надворешната политика, дека има малку поголема поддршка за Русија отколку за Украина, и дека речиси двојно повеќе испитаници сметаат дека Западот (27%) или Украина (6%) се најодговорни за конфликтот помеѓу Русија и Украина, отколку што сметаат дека најодговорна е Русија (17%).

Бугарија, земја-членка на ЕУ и НАТО се перципира како најголема закана, а Србија како најважен сојузник

Северна Македонија е единствената земја во Западен Балкан во која како најголема закана (23%) се смета Бугарија, која е земја членка на ЕУ и НАТО.

 

Убедливо најдобро мислење испитаниците од Северна Македонија (43%) имале за Србија која покажува проруски тенденции – каде што прорускиот курс (39%) во надворешната политика е поизразен отколку прозападниот (24%). Србија се смета за најважен сојузник од страна на 34% од испитаниците кај нас, а најважен сојузник за 46% од испитаниците во Србија е Русија, за која најголема закана е САД (36%).

 

Има ли појасен индикатор за зголемено антизападно расположение во Северна Македонија, од перцепцијата на земја членка на ЕУ и НАТО како најголема закана, а на антизападно и проруски ориентираната Србија како најголем сојузник – каде што, според анкетата на ИРИ, Путин ужива најголема поддршка од 80%, а Русија се смета за најголем сојузник од 46% од испитаниците?

(Авторот е раководител на истражувања во Институтот за медиуми и аналитика ИМА)

Извор: ИМA.мк

Вест на денот: ДИК прифати седум приговори, партиите реагираат, одлука за прегласување по исходот од тужбите до Управниот суд

Државната изборна комисија прифати седум од поднесените 27 приговори од политичките партии, па затоа следеа реакции од политичките партии, кои најавија тужби против одлуките на ДИК до Управен суд. Одлука за прегласување ќе има дури откако Управниот суд ќе се произнесе за сите поднесени тужби. 

До Државната изборна комисија се поднесени 27 приговори од политичките партии, девет од коалицијата „Вреди“, осум од ВМРО-ДПМНЕ, пет од СДСМ и четири од Левица. Од тие, ДИК уважи седум приговори од коалициите предводени од ВМРО-ДПМНЕ, СДСМ и Вреди и утврди нерегуларности за текот на гласањето и броењето гласови во петтата и шестата изборна единица. 

Според коалицијата Вреди, одлуката на ДИК потврдува дека Европскиот фронт се обидел незаконски да влијае врз изборниот резултат. „Тие се во паника. Не само што ќе си заминат во опозиција, туку и ќе одговараат за злоупотребите и кршењето на законите, но и затоа што вчера, со отварање на кутиите, се докажа дека преку злоупотреба на механизмите на власт, закани, уцени, притисоци и бугарскиот воз, се обиделе да ја нарушат волјата на народот и изборниот резултат, вели портпаролот на коалицијата „Вреди“, Фатмир Сабриу. 

Европскиот фронт обвини за изборен инженеринг и најавија тужби до Управен суд. Елми Азири од „Европски фронт“ на денешната прес-конференција информира дека до Управниот суд ќе ги обжалат донесените одлуки за приговорите што се однесуваат за петтата и шестата изборна единица: – „Ве известуваме дека веќе ги алармиравме сите надлежни институции и меѓународниот фактор бидејќи имаме точни информации дека во петокот преку политички притисок им биле дадени партиски инструкции на членовите на Државната изборна комисија од нивното седиште. Нагласуваме дека овие дејствија претставуваат кривични дела и „Европскиот фронт“ ќе ги преземе сите неопходни мерки и ќе ги искористи сите демократски форми за заштита на слободниот глас на граѓаните. Во таа насока, ве известуваме дека веднаш по донесувањето на одлуката истото ќе го обжалиме и до Управниот суд“. 

За изборните резултати денес реагираше и Стевчо Јакимовски од коалицијата  „Храбро за Македонија, кој изјави дека „Само од три места ни се скратени повеќе од 600 гласови и им се префрлени на други политички партии. Ова кажува колку голема беше кражбата на овие избори, но и дека овој начин на крадење гласови од помалите партии кои немаат набљудувачи на гласачките места е правен и во претходните изборни циклуси.“ и најави тужба до Управниот суд. Портпаролката на ДИК Радица Тодоровска Алексовска изјави дека „од коалицијата предводена од ГРОМ немаше пристигнат ниеден приговор.“

ДИК ќе носи одлуки за прегласување дури после исходот од тужбите до Управниот суд. „Секоја заинтересирана страна има право на тужба до Управен суд во рок од 24 часа по одлуката на ДИК, а Управниот суд одлучува во рок од 48 часа по поднесена тужба. После одлуката на Управниот суд, ДИК ќе излезе со конечен извештај за резултатите“, објасни портпаролката на ДИК, а потоа следи и одлука дали прегласување би можело да влијае на распределба на мандатите. 

Македонците со најголема поддршка за Отворен Балкан

Граѓаните на Црна Гора и на Северна Македонија се најинформирани за иницијативата Отворен Балкан, покажува најновото мултинационално истражување за Западен Балкан од страна на Центарот за анкетни истражувања (CISR) на Меѓународниот републикански институт (ИРИ).

На прашањето „Дали знаете што е иницијативата Отворен Балкан?“, 55% од анкетираните граѓани во Северна Македонија одговориле позитивно, а во Црна Гора 65%.

Најмалку информирани за иницијативата се во Косово (43%) и во Босна и Херцеговина (26%).

Анкетата на ИРИ ги прашала граѓаните во регионот дали ја подрржуваат оваа иницијатива.

Најголема поддршка иницијативата Отворен Балкан има кај граѓаните од Северна Македонија (48%), а потоа во Србија каде што поддршка за иницијативата ја кај 38% од Србите.

Отворен Балкан има најмала поддршка во Црна Гора (22%) и во Косово (12%).

Извор: Рацин.мк

Шкариќ: Идниот состав на Собранието ќе ги прифати промените на Уставот, но тоа не значи бугаризација на Македонија

Ги охрабрувам наредните власти да извршат уставни измени, бидејќи нема страв од никаква бугаризација, а после тоа Бугарите не можат да нѐ блокираат од аспект на нивните анахрони барања.

Ова го изјави професорот по уставно право, Светомир Шкариќ, во интервју за Вистинската телевизија (Вистел), потенцирајќи дека прифаќањето на промените на Уставот со впишување на Бугарите не значи бугаризација на Македонија.

– Идниот состав на Собранието ќе ги прифати промените на Уставот со впишување на Бугарите. Тоа не значи бугаризација на Македонија и после тоа треба да се размислува за нов Устав, бидејќи сегашниот со сите амандмани е неспроведлив – посочи Шкариќ.

Во врска со носењето и измените на низата закони како и измените на Кривичниот законик, случувањата во Судскиот совет, како и Законот за помилување, професорот посочи дека судската власт е онаа која може, како што рече, „да ја апсолвира и реши оваа тешка ситуација во која се наидува“.

– Како што Уставниот суд го поништи целиот закон за изменување на Законот за помилување од 2009 година за да може Иванов да ги помилува сите процесуирани од СЈО, така и Уставниот суд со времени мерки треба да го поништи последниот закон за изменување на Кривичниот закон за да се поништат и последиците од неговата примена – досега ослободените од кривична одговорност со која се штити политичката елита – истакна професорот.

Шкариќ го кажа својот став и за промената на името на државата.

– Името има врска со идентитетот, но не треба да бидат идентично третирани. Името опстојува, зборот Македонија е вградено во името на државата и ние сме единствена држава во светот која го содржи зборот Македонија – вели Шкариќ.

Извор: Градска.мк

Анкета на ИРИ за Западен Балкан: Силна поддршка за членството во ЕУ, нападите на Русија врз Украина се неоправдани

„Постои силна желба низ Балканот за зајакнување на врските со западните економии и за приклучување кон ЕУ.“

Вашингтон, ДЦ — Последното мултинационално истражување за Западен Балкан од страна на Центарот за анкетни истражувања (CISR) на Меѓународниот републикански институт (ИРИ) покажува широка поддршка за приклучувањето кон Европската унија (ЕУ) и силно мнозинство кое ја смета руската војна против Украина за неоправдана. Земјите во кои беше спроведена анкетата се Албанија, Босна и Херцеговина (БиХ), Косово, Северна Македонија, Црна Гора и Србија.

На прашањето дали би го поддржале приклучувањето кон ЕУ доколку денес се одржи
референдум, во пет од шесте земји силно мнозинство би гласало за приклучување кон Унијата и тоа од 68 отсто во Северна Македонија и во Босна и Херцеговина до 92 отсто во Албанија. Во Србија, повеќето од 40 отсто го поддржуваат приклучувањето кон ЕУ.

„Постои силна желба низ Балканот за зајакнување на врските со западните економии и за приклучување кон ЕУ“, рече Пол Мекарти, директор за Европа во ИРИ. „Оваа широка поддршка покажува дека луѓето од целиот регион веруваат дека понатамошната интеграција во Европската унија може да помогне за постигнување одржлив просперитет.“

Всушност, кај приоритетите на граѓаните за владите на Западен Балкан доминираат
економските прашања. Освен Албанија, каде што невработеноста беше главен проблем, високите цени и трошоците на живот претставуваат најголема грижа за граѓаните во другите пет земји од Западен Балкан. Покрај тоа, во сите шест земји, корупцијата се појави како еден од првите три приоритетни проблеми.

Анкетата, исто така, покажа дека мнозинството во пет од шесте анкетирани земји верува дека руската војна против Украина е целосно или донекаде неоправдана. Во Србија, пак, повеќето од 49 отсто целосно или донекаде ја оправдуваат Русија.

„Иако овие бројки се претежно позитивни, српските одговори се вознемирувачки“, рече Мекарти. „Доколку мирот и безбедноста се долгорочни цели на Балканот, подобра опција за Србија ќе биде да ги отфрли руските предлози и да изгради посилни врски со Западот“.

Методологија

Истражувањето беше спроведено во име на Центарот за анкетни истражувања  на ИРИ од  страна на Ипсос во периодот меѓу 2 февруари и 5 март 2024 година. Податоците беа собрани преку интервју лице-в-лице кое беше администрирано со компјутерски асистирано лично интервју (CAPI) во домовите на испитаниците со користење на метод на повеќестепена веројатност кој е дизајниран да резултира со репрезентативни примероци на национално ниво во секоја од земјите. Стапките на одговор се движат од 21% до 40%. Големината на примерокот по земја варира меѓу n=1.036 и n=1.238, а маргината на грешка се движи од 2,8 до 3,0 поени.