дома блог страница 2

Јазбец: Во политиката лесно е да се победи, но доста потешко е да се реализира програмата

Поранешниот словенечки амбасадор во Македонија, Милан Јазбец потенцира дека да се промени меѓународен договор е уште потешко отколку да се донесе.

Во принцип во политиката секоја промена е добра бидејќи треба да донесе нешто ново. Тоа е една работа, а другата, колку што пратев, е оваа новата власт има многу големо мнозинство во собрание. Тоа е добар основ да се забрза европскиот пат и ќе биде полесно ако се продолжи европската политика, вели Милан Јазбец, поранешен словенечки амбасадор во Македонија во интервју за Цивил и Слободен печат.

Тој вели дека како поранешен амбасадор во Скопје имал можност да се среќава и со актуелната претседателка на државата и со идниот премиер и дека се познаваат добро.

Јазбец: Во политиката лесно да се победи но доста потешко е да се реализира програмата

„Нека не ми замерат, но во политиката е релативно лесно да се победи. Тоа е моја констатација. Но доста потешко е да се владее. Владеење значи да се има многу јасна програма, детална програма, широка програма и многу луѓе кои работат на реализирање на програмата. Тоа секогаш е потешкото. И мислам дека и тука нема да биде лесно поради овие големи промени. Но, тоа треба да се очекува. Јас мислам дека и медиумите и јавноста треба да го изразуваат ова очекување, бидејќи сум сигурен дека и европските институции, особено ЕУ, ќе очекуваат напредок посебно после членството во НАТО евроинтеграцискиот потег би требало да се забрза“, вели Јазбец.

Поранешен словенечки амбасадор во Македонија потенцира дека да се промени меѓународен договор е уште потешко отколку да се донесе.

„Да се дојде до некои меѓународни, посебно до билатерални договори и посебно кога тоа се случува со соседи овде на Балканот, е многу сложен процес. И кога до него ќе се дојде се знае дека тоа се случило низ еден тежок, долг и сложен пат. Оттука, да се промени еден таков договор е уште потешко. Впрочем, тоа и би немало некаква смисла зашто да се промени меѓународен договор е уште потешко отколку тој да биде донесен. Така на пример, тие кои активно учествувале во неговото градење сигурно вложиле голема енергија која сега би било потребно повторно да се вложува, повторно да се троши, а секако доколку за тоа нема некои посебно оправдани причини. Тоа е една работа. Другата е стара најмалку бар две илјади години“, вели Јазбец.

Јазбец: Да се промени меѓународен договор е уште потешко отколку да се донесе

Тој додава дека во дипломатијата, во оваа материја со договорите има две важни правила. Едното е договорите да се почитуваат кои се склучени, формализирани, ратификувани.

„Но, бидејќи ниедна работа не е апсолутна. Второто е, доколку по некое време и пред сè поради некои глобални причини се дојде до големи, до круцијални промени во меѓународната околина и воопшто во меѓународните односи, во еден таков случај можат да се договорат промени. Но тие не можат да се случат само кај едната страна, туку тоа е процес во кој ќе треба да бидат вклучени сите страни учесници во договорот кој бил претходно склучен. Притоа, исто така е многу важно, доколку дојде таква ситуација да се има предвид со раскинување на договорите или со промени во нивните содржини, да не се направи некаква штета. Тоа во теоријата на правото е доста јасно, но во праксата е тешко остварливо“, истакна Јазбец.

Извор: ЦивилМедиа.мк

 

Мангова: Има странско поттикнување на национализам, но тој има и домашен корен како што видовме во предизборието

„Може да се толкува дека некогаш националистичката реторика е поттикната и предизвикана од странски сили. Иако знаеме од минатото дека има и домашен корен национализмот“ рече Илина Мангова од Меѓународниот републикански институт (ИРИ) во утринската програма на „Слободен печат“, коментирајќи ја нивната последна анкета.

Таа додаде дека тоа се виде и во предизборната реторика и кажа дека граѓаните како главни предизвикувачи на национализмот ги идентификуваат политичките партии и лидери.

„Сега тие процеси се завршени и одговорноста е на политичките актери да препознаат што граѓаните очекуваат, а не да се навраќаат на национализмот, како едно средство од минатото“ рече Мангова.

Таа додаде дека клучната одговорност на политичките лидери треба да биде, паралелно на работењето на евроинтегративниот процес, да ги менаџираат позитивно и конструктивно меѓуетничките односи, за национализмот да не прерасне во проблем.

„Тука се покажува одговорноста на овие политички актери кои си играат со национализмот кога се слаби сами по себе да донесат резултати и силни институции кои ќе ги сервисираат граѓаните“ рече Мангова.

Еве го првиот настан на Трн.мк – „Боцни си кирилица” на 22 мај

Многумина нѐ прашаа зошто не организираме друштвени настани? Не одговоривме никому ништо, туку седнавме, мислевме и еве го одговорот.

Во очи празникот „Св. Кирил и Методиј” ве каниме на првиот Трн настан.

На 22 мај, среда, од 20 часот сме во Бруталиск.

Дојдете и „боцнете” од кириличното мени:

– Јовица Михајловски со кириличен поздрав

– Џијан Емин со музичка подлога и диџејски сет

– Ивана Павлаковиќ и Несрин Таир со изведба на народно творештво собрано од Цепенков

– ТеатроСк со статуa од собирачот на народно творештво

– Давор Кешкец ќе црта кирилица во живо

– Васо со свој диџејски перформанс

БОЦКАМЕ на КИРИЛИЦА

22 мај, среда, 20 часот

Бруталиск

Паметење на жртвите од геноцид врз кримско-татарскиот народ: Идеолошките наследници на руските тоталитарни режими го вратија ужасот на украинска почва

0

18 мај е Ден на паметење на жртвите од геноцидот на кримско-татарскиот народ. Како резултат на присилната депортација, повеќе од 190 илјади Кримски Татари ги загубија домовите, татковината, роднините, а многумина ги загубија и животите.

 

Во 2015 година, Врховната Рада на Украина го призна ова злосторство на комунистичкиот режим како геноцид врз кримско-татарскиот народ, за време на кое беа извршени намерни убиства, беа предизвикани сериозни телесни повреди, намерно се создаваа услови за живот насочени кон физичко уништување на кримско-татарскиот народ. Канада, Латвија и Литванија исто така ги признаа овие дејства како геноцид врз кримско-татарскиот народ.

За време на целото негово постоење, комунистичкиот тоталитарен режим извршуваше злосторства на репресија, убиства, депортации, геноциди.

На 18 мај 1944 година, советскиот тоталитарен режим започна операција за депортирање на кримско-татарскиот народ од Кримскиот Полуостров. Во текот на 2 дена (18-20 мај), Кримските Татари беа носени со автомобили на железничките станици Бахчисарај, Џанкој и Симферопол, од каде што во ешалони ги испраќаа на исток. За време на овие денови беа депортирани повеќе од 190 илјади Кримски Татари. Времетраењето на убиственото патување на депортираните до местата на специјалните населби во товарни вагони траело во просек 2-3 недели. По пат, во тесни вагони, без храна, вода и медицинска нега, од глад и болести загинаа од 7.000-7.900 Кримски Татари.

ДЕПОРТАЦИЈА И ГЕНОЦИД: Тоталитарниот советски режим ги депортира Кримските Татари, 1944

На присилно депортираните им беше „доделен“ статус на „специјални емигранти“, што предвидуваше постојан надзор над нив од репресивни тела, регистрација во командантски канцеларии, принудна исцрпувачка физичка работа. Според информациите на НКВД (Народниот комесаријат за внатрешни работи) на Узбекистанската ССР, 16.052 Кримски Татари (10,6%) починаа од болести и нехумани услови во првата половина од годината, а 13.183 (9,8%) во 1945 година. Вкупно, само во Узбекистан во првата една и пол година починаа речиси 30.000 Кримски Татари.

Советскиот режим, исто така, ги интензивираше геноцидните дејствија со бришење на сеќавањето за Кримските Татари од историјата на Кримскиот полуостров: кримската историја беше препишувана, беа наметнувани руските империјални наративи за „со векови рускиот“ Крим, намерно и масовно се ширеа митовите за „нацијата предавник“. Имигрантите од Руската Советска Федеративна Социјалистичка Република беа намерно носени на полуостровот и ги населуваа во домовите на Кримските Татари. Исто така, имињата на населените места и улиците, кои биле со кримско-татарско потекло, станале руски.

ГЕНОЦИД НА КРИМСКО ТАТАРСКИОТ НАРОД, 1944

Денес, РФ е наследник на овие мизантропски практики – го оправдува и слави сталинистичкиот режим, гради и усовршува репресивни политики, чии жртви веќе станаа илјадници жители на окупираните територии.

Руската Федерација го негира геноцидот на Кримските Татари во 1944 година и не презема одговорност за сталинистичките репресии и депортации. Згора на тоа, од окупацијата на Автономната Република Крим и градот Севастопол во 2014 година, РФ ги продолжи злосторствата на тоталитарниот советски режим и руската империја против Кримските Татари: врши репресија и прогонување, намерно ги крши нивните права како домороден народ на Украина, незаконски регрутира во воена служба, го уништува културното наследство, ја фалсификува историјата, го милитаризира образованието и јавниот живот.

Украинскиот народ, кој претрпе прогонувања и репресии, стана жртва на советскиот геноцид, Гладоморот од 1932-1933 година, е свесен и целосно ја споделува болката на депортацијата. Ова е наша заедничка трагедија.

80 години по депортацијата, РФ ги продолжува репресиите врз Кримските Татари, кои не се согласуваат со окупацијата на Кримскиот полуостров, кои го приближуваат ослободувањето на Крим.

Мачења, егзекуции на невини луѓе без судење и истрага, депортации, филтрациони логори, масовни прогони од политички причини – се чинеше дека со падот на советскиот систем, сето тоа засекогаш остана во историјата. Сепак, по руската инвазија на Украина, идеолошките наследници на тоталитарните режими во Русија повторно ги донесоа овие ужаси на украинска почва.

Денес, кримско-татарскиот народ повторно не може да се чувствува безбедно во својата родна земја. Со почетокот на руската окупација на Кримскиот полуостров во 2014 година, историјата се повторува. Илјадници Кримски Татари беа принудени повторно да ги напуштат своите родни домови. Сите овие години, руските окупаторски власти ги затвораат зад решетки, ги мачат, спроведуваат репресивна политика на заплашување, исчезнување на Кримските Татари без трага, кршење на граѓанските, политичките и културните права.

Злосторниците на РФ ќе бидат изведени пред лицето на правдата.

Амбасада на Украина

Насловна илустрација: „Возот на смртта“ – Рустем Еминов, извор Мајдан Прес

Извор: ЦивилМедиа.мк

Северна Македонија на 32 место на виножитната мапа која ја одразува правната и политичката ситуација за човековите права на ЛГБТИ луѓето во Европа

Северна Македонија оваа година се најде на 32-то место на најновата виножитна мапа и индекс на организацијата ИЛГА-Европа, со остварени само 30,5% од потребните реформи за унапредување на позицијата и пристапот до човековите права на ЛГБТИ луѓето.

ИЛГА-Европа секоја година започнувајќи од 2009 година, во пресрет на одбележувањето на Меѓународниот ден против хомофобија, бифобија и трансфобија ја објавува виножитната мапа и индекс што ги рангира сите 49 европски земји на скала од 0% (грубо кршење на човековите права, дискриминација на ЛГБТИ луѓето) до 100% (почитување на човековите права, целосна рамноправност).

На врвот на виножитната мапа и индекс се најде повторно Малта, која веќе девет години е на прво место во однос на почитување и унапредување на правата на ЛГБТИ заедницата, а на последно место е Русија со само 2%,  која за разлика од минатата година изгуби седум поени и падна за три места поради федералната легислатива која забранува правно признавање на родот и специфична здравствена заштита за транс лицата.

Од земјите во регионот најдобро котира Хрватска која е на 18-то место со 50,06%. Албанија е на 26-то место, Србија е на 27-то место, а Косово на 28-то место. Полошо од нас од земјите во регионот е рангирана само Бугарија која оваа година е на 39-то место на виножитната мапа и индекс на ИЛГА-Европа.

Повеќето земји кои се во процес на пристапување во ЕУ (Албанија, Босна и Херцеговина, Косово, Молдавија, Црна Гора, Северна Македонија, Србија, Украина) заостануваат во своите обврски, го стопираат воведувањето на закони и на тој начин ги ставаат своите граѓани сè повеќе во ризик од реални реакции и поткопување на основните човекови права, потенцираат од ИЛГА-Европа.

Според извршниот директор на ИЛГА-Европа, Чабер: „ЕУ треба да посвети големо внимание не само на порастот на политичкиот говор на омраза против ЛГБТИ луѓето, туку и на новите алатки за угнетување, како што е руската криминализација на цел сегмент од населението на земјата. Напорите за поделба и одвлекување на вниманието од консолидираните авторитарни режими дополнително протекуваат во другите европски земји во време кога изборите би можеле да ја турнат Европа во рацете на лидерите што сакаат да формираат радикална десница, антидемократска Европска Унија. На Европа ѝ требаат посилни закони и политики за заштита на ЛГБТИ луѓето. Без нив, не можеме да зборуваме за безбедност или за владеење на правото и демократијата“.

За повеќе информации за виножитната мапа и за рангирањето на другите европски земји консултирајте го сајтот на ИЛГА-Европа со клик овде.

Извор: ЦивилМедиа

Дрекслер: Постоечката Преговарачка рамка веќе ја нуди најдобрата гаранција

„Мислам дека ние во Германија, сме многу свесни за големите напори, што Северна Македонија веќе ги презеде во пристапниот процес кон ЕУ. И да, можам да разберам дека искуствата од овој процес имаат последователен ефект во општеството. Сметам дека ќе стане проблем тогаш кога скепсата ќе помине во резигнација. Понекогаш имам впечаток дека, довербата во ефикасноста на политичкото дејствување во земјата во целина е ниска. За да се поврати таа доверба за оние што во иднина ќе ја понесат политичката одговорност за земјава ќе важи, најавените реформи и ветувања сега паметно и енергично да ги претворат и во дела,“ вели Амбасадорката на СР Германија во земјава, Петра Дрекслер,“ во интервју за 360 степени, во врска со прашањето, за неуспехот на Европската Унија да испорача за земјава, да почне пристапни преговори веднаш по прашањето на името.

На прашањето дали може да се бара и очекува да се добие она што го бара ВМРО-ДПМНЕ , промена на условите и гаранции на т.н идентитетски прашања, за да ги поддржи уставните измени, амбасадорката Дрекслер посочува на предочувањето во континуитет изминатиот период од нивна страна, за постоечката Преговарачка рамка.

„Мислам дека од германска страна постојано предочувавме колку многу ги цениме македонскиот идентитет македонската култура, и македонскиот јазик. Тоа г нагласи уште еднаш и Бундестагот, минатата година со резолуција. И мислам дека токму преку пристапниот процес со ЕУ, , македонскиот јазик доби особено на значење и надвор од своите граници. Истовремено, исто така јасно Северна Македонија со сите земји, членки на ЕУ, се спогоди за преговарачката рамка, за пристапните преговори со ЕУ. Оваа преговарачка рамка, е утврдена и туѓа спаѓа и спроведувањето на уставните промени;“ посочува Дрекслер.

Вест на денот: Мицкоски тврди дека коалицијата на ВМРО-ДПМНЕ веќе има 61 пратеник, и цели на двотретинско мнозинство заедно со други коалициони партнери

Во контекст на преговорите на ВМРО-ДПМНЕ и ВЛЕН за нова влада, вест на денот во медиумите е изјавата на Мицкоски дека коалицијата предводена од ВМРО-ДПМНЕ веќе има обезбедено 61 пратеник: „Можам да кажам дека како ВМРО-ДПМНЕ и коалиција „Твоја Македонија“ ги завршуваме разговорите со неколку од пратениците кои што не се дел од коалицијата „Твоја Македонија“, и можам да кажам дека во моментов успешно консолидиравме 61 пратеник… Како коалиција „Твоја Македонија“ предводена од ВМРО-ДПМНЕ во парламентот покрај 58 пратеника кои што ги има автентично самата коалиција, и очекуваме одлука на Управниот суд да видиме што ќе се случува во изборната единица 5 и 6, можам со задоволство да кажам дека имаме консолидирано точно 61 пратеник, но тоа нема да не повлече од разговорите со идните потенцијални коалициони партнери, како што е коалицијата ВРЕДИ или ВЛЕН“, изјави Мицкоски за медиумите.
Мицкоски изрази оптимистичко уверување дека негова втора цел е заедно со коалиционите партнери да консолидира две третини во македонскиот парламент:
„Па, разговорите од тоа што сум информиран, од учесниците од ВМРО-ДПМНЕ, на тие разговори, е дека се водат во правилна, вистинска насока. Оптимисти сме дека нашата втора цел е да заедно со коалиционите партнери успееме да консолидираме две третини во македонскиот парламент. Зошто ни се потребни овие две третини? Овие две третини се потребни затоа што имаме сериозна намера тоа што го зборувавме пред изборите, да направиме сериозно реструктуирање и реекипирање на владиниот кабинет“, изјави Мицкоски за медиумите.
Повеќе медиуми го објавија и соопштението од ВМРО-ДПМНЕ испратено по состанокот на работните групи во кое се истакнува: „При таквото раководење на идниот владин состав да се запазат договорените принципи на делување, силно динамизирање на евроинтеграциите, бескрупулозна борба против корупцијата и криминалот и економски реформи за повисок животен стандард“.
Во друго партиско соопштение на ВМРО-ДПМНЕ, како главен приоритет на идната влада се истакнува бизнисот и економскиот развој на Македонија како држава: „Идната Влада во Македонија на Коалицијата „Твоја Македонија“ предводена од ВМРО-ДПМНЕ има намера како главен приоритет да го има бизнисот и економскиот развој на Македонија како држава и да работи за доброто на граѓаните“, истакнал претседателот на ВМРО-ДПМНЕ, Христијан Мицкоски при обраќање на денешниот Самит „Македонија 2025“.

Р.С

Блинкен ја свиреше на гитара „Rockin’ in the Free World“ во бар во Кијив, на руските пропагандисти не им се допадна песната

Вчера американскиот државен секретар Антони Блинкен ненајавено пристигна во Кијив во првата посета на Украина од страна на висок американски функционер откако Конгресот го усвои долго одложуваниот пакет воена помош од 61 милијарда долари за земјата минатиот месец. Посетата има за цел да ја покаже солидарноста на САД со Украина додека таа се бори да се одбрани од секојдневното масивно руско бомбардирање на нејзината североисточна граница.

По разговорите со Володимир Зеленски и Дмитро Кулеба, тој заедно со американската делегација го посети кијивскиот бар „Бармен Диктат“. Неочекувано, државниот секретар се качи на сцената и со украинските музичари ја отпеа песната „Keep on Rockin’ in the Free World“ од канадскиот пејач Нил Јанг.

Ова секако не им се допадна на властите во Кремљ, кои очигледно исфрустрирани поради неуспехот да го валоризираат забавувањето на американската воена помош за Украина, преку своите пропагандни канали се обидоа да фрлат темно петно на гитарскиот настап на Блинкен во Кијив, вклучително и преку нивните филијали во Северна Македонија,

На Москва очигледно не и се допадна песната, па преку изјавите на портпаролката на руското МНР, Марија Захарова се обидоа да ја дезавуираат пораката на поддршка за Украина што со својата интерпретација ја пренесе американскиот државен секретар, пркосејќи им на руските агресори со својот настап во бар во главниот град на Украина каде секојдневно се слушаат предупредувачки сирени за руски ракетни напади.

Се разбира, докажаните пропагатори на руските малициозни наративи во земјава не пропуштија да ги пренесат изјавите на нивната неформална „шефица“ за ширење на руска пропаганда, Захарова, која деновиве како да не се симнува од страниците на овие медиуми, било да се работи за банални прашања, како нејзиното „анатемисување“ на Евровизија, преку правдање за бојкотот на парадата на победата во Москва, до нејзините лажни дисквалификации на перформансот на Блинкен во Кијив.

Извор: ЦивилМедиа

Партиски порази за државни победи!

  • Дали СДСМ ги изгуби изборите поради нереформирањето на системот и невоспоставувањето на правна држава или поради етничкиот фактор?
  • Колку ja чинеа, во смисла на партиски рејтинг, чекорите кои државата ја водеа напред и ги подобрија меѓуетничките односи?
  • Како се одразија крупните чекори кои го подобруваа статусот на Албанците врз рејтингот на СДСМ?

СЕФЕР ТАХИРИ

ЦИВИЛ МЕДИА

По длабокиот пораз на СДСМ и нејзините сателити од коалицијата, кои повеќе ѝ правеа штета отколку што ѝ помагаа, гледам и се чудам како одеднаш излегоа „паметњаковци“ кои солат памет како требало да биде, кои се грешките или, пак, која стратегија требало да се следи за да се дојде до подобар резултат!

И очекувано, типично балкански, дел од нив, кои дојдоа на високи позиции, членови на управни одбори, добија хонорари за „советодавни услуги“ – молчат! Веројатно очекуваат ангажмани од новата власт! „Мало сутра“ би рекол Заев!

И пред изборните резултати, сум истакнувал дека фактот што главната парола или слоган со кој СДСМ дојде на власт „Нема правда, нема мир“ останува „мртво слово“ на хартија ќе ѝ се одмаздува од искрените гласачи. И тоа се случи! Мир има, правда нула.

Проектот на „Шарената револуција“ беше детронизиран одвнатре во системот и тоа значеше губење на надежта за подобро утре, за посветла иднина, за правна и демократска држава. Критиките околу оваа тема држат, без разлика од кого доаѓаат. Сегашната власт вешто и максимално поентираше на делот на невоспоставување на правниот поредок, кој ќе работеше поефикасно и по принципот на казнивост на тешките кривични дела, а не на неказнивост како што се случи. За жал!

Но треба да се земат предвид и неколку историски факти, кои на „државотворната“ партија ѝ донесоа историски изборен пораз.

Во 1993 година, социјалдемократите и Глигоров го прифатија договорот за привремената референца ПЈРМ – Поранешна Југословенска Република Македонија.

Во 2001 година, по конфликтот, во македонскиот политички блок беше партијата која се залагаше за мировниот процес и една од главните придонесувачи за постигнување на Охридскиот договор. Етнонационалистите ја прогласуваа за партија која е попустлива кон Албанците, а екстремистите за предавничка.

Истиот наратив се употреби и во 2004 година, кога се случи официјализирањето на Тетовскиот универзитет кој, патем, поранешни челници на оваа партија го нарекува „мртвородено бебе“. Истата година, партијата под водство на Владо Бучковски свесно и жртвувајќи го рејтингот на партијата, го спроведуваа проектот за новата територијална организација, со која Струга и Кичево станаа албански општини.

По враќањето на власт во 2017 година, за прв пат во историјата беше избран пратеник Албанец за претседател на Собранието, а беше изгласан Закон за употреба на јазиците. Освен него, Заев се обиде да го операционализира концептот „Едно општество за сите“. Не само вмровците, туку и дел од „интелектуалната елита“ (етноцентричната) веќе наголемо ја прогласуваа за предавничка партија. Себеси се прогласија за патриоти!

Под ваков политичко пропагандистички оркестриран притисок, проследен со медиумски патриотски коментари и анализи, но и интелектуални мудрувања, се потпиша Договорот со Грција. Северна Македонија е новото име, а противниците сè уште не можат да се помират со тој факт. Исто е и со договорот за добрососедски односи со Бугарија и прифаќањето на „францускиот предлог“. Храбри чекори за општеството, кои ја ставаа во поразителна позиција.

Капак беше почетокот на изградбата на Коридорот 8 и избирањето на Талат Џафери за премиер Албанец! После ова, некритичката и популистичка јавност извика хорски: „Албанците ни ја зедоа државата!“

И така, ден по ден, државата имаше порелаксирани интеретнички односи, се стабилизираше внатре, се зголемуваа шансите за нејзина интеграција во ЕУ, а се намалуваше рејтингот на СДСМ.

Ова не значи дека во иднина, оваа партија не треба да преземе крупни чекори за развојот на државата. Добрите македонско-албански односи се темелот на државата!

Проф. д-р Сефер Тахири е универзитетски професор. 

Извор: ЦивилМедиа

Темпото на руските офанзивни операции во северната Харкивската област продолжува да се намалува, одбиени 30 руски напади во јужниот одбрамбен сектор

За жестоките битки во Донецката и Харкивската област на својот профил на Х објави украинската амбасадорка во земјава, Лариса Дир, која нагласи дека за заштита на цивилното население во Харкивската област, на Украина ѝ се потребни 2 системи Patriot!.

Руските сили напреднаа не повеќе од осум километри од меѓународната граница во северниот регион Харков и се чини дека во моментов имаат приоритет на создавање „тампон зона“, соопшти Институтот за проучување на војната (ISW) во својот последен извештај.

Експертите забележуваат дека темпото на руските офанзивни операции во северниот дел на Харкивската област продолжува да се намалува откако руските сили првично ги зазедоа областите за кои украинските власти сега потврдија дека се помалку одбранети.

Украинскиот претседател Володимир Зеленски и украинските воени претставници изјавија дека украинските сили делумно ја стабилизирале ситуацијата во северниот регион Харкив, кој се граничи со Русија.

Портпаролот на украинската група на силите Хортица, потполковник Назар Волошин, изјави дека руските сили се обидуваат да постигнат тактички придобивки во близина на Лукјанци и Вовчанск за да создадат упоришта за иден напредок, но дека украинските контранапади и артилериски и беспилотни летала ги спречуваат руските сили да се зацврстат во овие области.

Претставници на администрацијата на регионот Харкив на 15 мај изјавија дека постојаното руско гранатирање им оневозможува на украинските сили да воспостават утврдувања на три до пет километри од меѓународната граница во регионот Харкив и дека украинските сили ги изградиле првата и втората линија на одбрана на околу 12 до 13 километри. и 20 километри од меѓународната граница, соодветно.

Според оценката на ISW руските сили напреднале не повеќе од осум километри од меѓународната граница во северниот регион Харкив.

„Руските сили беа во можност да направат тактички напредок во северниот дел на Харкивската област од 10 мај во области каде што украинските сили намерно не воспоставија значителни одбранбени линии и во моментов се чини дека имаат приоритет на создавање „тампон зона“ наместо длабока пенетрација во Харкивската област. “, се вели во извештајот.

Дополнително, ISW забележа дека руските сили кои дејствуваат од Русија лесно можат да извршат артилериски напади против украинските одбранбени позиции блиску до меѓународната граница, а забраните од Запад за употреба на системи за оружје обезбедени од Запад за напади врз задните руски области преку границата ги прават потенцијалните фиксни украински одбранбени позиции блиску до меѓународната граница „ранлив и можеби неодбранлив“.

Како што беше соопштено предходно вечерта на 15 мај, претседателот Володимир Зеленски изјави дека украинските одбранбени сили успеале делумно да ја стабилизираат ситуацијата во пограничните области на регионот Харков.

Во оперативната зона на Јужните одбранбени сили, украинските бранители вчера одбија седум непријателски напади на левиот брег на реката Днипро и 23 напади во секторот Орихив, објавија јужните одбранбени сили на Украина на Телеграм, според Укринформ.

„Во секторот Орихив, окупаторите извршија 23 напади, од кои 19 во областа Старомаиорске и 4 во областа Роботин“, се вели во соопштението.

На левиот брег на реката Днипро во привремено окупираниот дел од регионот Херсон, непријателот изврши седум неуспешни напади, претрпе загуби и се повлече на своите почетни позиции.

Во текот на изминатиот ден, 76 непријателски извидувачки беспилотни летала беа забележани како прелетуваат над оперативното подрачје.

Како што објави Укринформ, интензитетот на непријателствата во секторот Харкив се зголеми, при што украинските бранители одбија десет непријателски напади во околината на Слобожанске, Вовчанск, Старица и Липци.

За жестоките битки во Донецката и Харкивската област  на својот профил на Х објави украинската амбасадорка во земјава, Лариса Дир:

“813. Донецката и Харкивската област – жестоки битки со окупационите сили на државата-терорист рф. рф жестоко ги напаѓа населените места, пали се што ќе ѝ се најде на патот. За заштита на цивилното население во Харкивската област, на Украина ѝ се потребни 2 системи Patriot!”.

 

Извор: ЦивилМедиа