дома блог

Изборна хроника на Цивил: Продолжуваат кампањите за претстојните претседателски и парламентарни избори

Продолжуваат кампањите за претстојните претседателски и парламентарни избори, каде претседателските кандидати, како и кандидатите за пратеници во шесте изборни единици ги претставуваат нивните програми пред граѓаните низ државата. Првиот круг на претседателските избори ќе се одржи в среда, на 24 април, додека пак, вториот круг предвидено е да се одржи на 8 мај, заедно со парламентарните избори.

Пред зградата на ЕУ во Скопје, СДСМ, Коалицијата за европска иднина и кандидатот за претседател Стево Пендаровски денеска ќе одржат централен граѓански митинг, на кој ќе се обратат претседателот на ПЕС Стефан Левен, претседателот на СДСМ Димитар Ковачевски, како и претседателскиот кандидат Стево Пендаровски. Предвидено е куси обраќања да имаат и носителите како и коносителите на изборните листи на СДСМ и Коалицијата.

Главен митинг на плоштад „Македонија“ во Скопје, денеска ќе одржи и коалицијата предводена од ДУИ „Европски фронт“, додека пак, албанската опозициска коалиција „Вреди“ ќе одржи митинг на плоштадот во Гостивар.

Движењето ЗНАМ – За наша Македонија ќе одржи прес-конференција пред Националната и универзитетска библиотека „Св. Климент Охридски“ во Скопје, на која ќе се обрати носителот на листа во Изборната единица 1, Бобан Карапејовски. Својата програма пред граѓаните денеска ќе ја презентира и Работничката партија, која во Струга ќе оствари средба со граѓаните пред Соборниот храм „Св. Ѓорѓи“.

Синоќа во рамки на третиот ден од кампањата за парламентарните избори, СДСМ и Коалицијата за европска иднина одржаа граѓански собир во Тетово, Брвеница и Желино, на кој претседателот на СДСМ Димитар Ковачевски најави дел од мерките како што се енергетска реформа, борба со корупцијата, реформи во судството, намалување на раководните и функционерските места во институциите и администрацијата во насока на предвидената програма за Европска Македонија.

– Со членството во ЕУ ќе се случи вистинска и суштинска промена на подобро во нашата земја. Јас верувам дека во европска Македонија животниот стандард ќе биде многу подобар и дека ќе успееме да изградиме систем на владеење на правото и ефикасна борба против криминалот и корупција. ЕУ не секогаш беше фер со нас. Но тоа не значи дека треба да се откажеме, истакна Ковачевски.

Претседателскиот кандидат од Коалицијата за европска иднина, Стево Пендаровски, одржа митинг во Струмица, на кој се осврна на настаните од 27 април 2017 година истакнувајќи дека ним ни на сон не им паднало да влегуваат во Парламентот и да убиваат колеги пратеници. Како што рече, и по толку години наместо да се извинат и да кажат погрешивме тие преку нивната противкандидатка најавувале амнестија на тие луѓе.

– Значи тие не биле насилници, ние сме биле насилници, тие биле наводно патриоти, а ние сме предавници. Овие луѓе тука, мнозинска Македонија, се срамеше од тоа што тие луѓе го правеа само со една единствена цел-да не ја предадат власта на оние кои на легитимни демократски избори ја добија довербата на граѓаните да ја водат земјата. Ние тоа ниту сме го правеле, ниту ќе го направиме, рече Пендаровски.

Тој синоќа ја прифати поканата на националниот јавен сервис за учество на дебата со сите противкандидати во претседателската трка.

– Решив да ја прифатам поканата за заедничка дебата на националниот јавен сервис – Македонска радио телевизија, со оглед на тоа дека сите мои противкандидати ја прифатиле поканата да учествуваат во дебатата, истакна Пендаровски.

Кандидатот за претседател од ВМРО-ДПМНЕ и коалицијата, Гордана Силјановска – Давкова, синоќа пред граѓаните на централниот митинг во Делчево рече „чест е да се биде во Делчево, градот на Гоце, кој за актуелниот претседател е Бугарин“.

– Институциите треба да бидат насочени кон искористување на јавно добро, а не да ги користите во политички цели, да снимате спотови во институциите, славите роденден. Институциите не смеете да ги фамилијализирате. Затоа ние треба да ставиме крај на ужасната феудализација во Македонија од луѓе со ограничен ум, од луѓе кои преку ноќ се збогатија, рече Силјановска – Давкова.

Претседателот на ВМРО-ДПМНЕ, Христијан Мицкоски на синоќешниот митинг во Пехчево пак, ја побара поддршката од граѓаните за освојување на 61 пратеник за формирање на стабилна влада која, како што рече, ќе ја трансформира Македонија и исправи сите погрешни политики од изминатите шест и половина година.

– Некои овие зборови за 61 пратеник ги извртуваат за да ме направат анти Албанец, но јас не сум анти Албанец, туку анти криминалците од ДУИ како Али Ахмети, Артан Груби и сличните. Кога велиме 61 пратеник мислиме да имаме стабилна влада која ќе ја трансформира Македонија, влада која ќе ги исправи сите погрешни политики од изминативе 6 и половина година. Планираме да ја развиваме државата. Мора да ја вратиме надежта кај граѓаните. Затоа е важно оваа порака на национално единство да ја рашириме низ Македонија. За национално обединување, изјави Мицкоски.

Движењето ЗНАМ – За наша Македонија, во рамки на претседателската и парламентарната кампања, синоќа во Битола одржа митинг на кој се обрати претседателскиот кандидат Максим Димитриевски. Димитриевски на граѓаните во Битола им порача дека доколку ја добие нивната поддршка, како врховен командант ќе се заложи да се заштитат правата на граѓаните, како и правата на бранителите, затоа што како што рече, политичарот не смее да биде над граѓанинот.

– Граѓанинот е на дното, а елитата е на врвот. Тука се кога се бара власт, а подоцна кога ќе треба да се испорача пред граѓаните си седат и си прават ситни калкулации по кабинетите кај што се договараат со својот вечен партнер ДУИ кој повеќе од 20 години работи во оваа држава, кој со пушка влезе во Собрание, рече Димитриевски.

Претседателскиот кандидат од Европскиот фронт, Бујар Османи, вчера посети неколку тетовски села од каде порача дека постојат реални шанси да помине во вториот круг како кандидат Албанец, бидејќи како што рече, кандидат е на девет политички партии и четири заедници, кои вкупно сочинуваат 47 отсто од населението во Северна Македонија, Албанци, Турци, Бошњаци и Роми.

– Ова бара мобилизација, затоа нема место кое не сум го посетил. И најголемата порака што можеме да ја пратиме е дека сега сме држава на два народа, кои се натпреваруваат во вториот круг за претседател, еден Македонец, еден Албанец. Ова е историска порака. Затоа ве замолувам да се мобилизирате, да овозможите да се пробие оваа бариера, бидејќи се создава еуфорија, а еуфоријата е како лавина од снег што собира се пред себе. Затоа ве повикуваме луѓе, за да ја оствариме оваа историска победа, да одиме во вториот круг, порача Османи.

Претседателскиот кандидат на Левица, Билјана Ванковска, продолжи со преставување на својата програма во Битола, од каде упати порака дека е среќна што токму Битола е местото кое и ја дало најголемата поддршка за време на собирање на потписите. Рече дека таа победа ќе се преслика и во среда низ целата Република.

Ванковска ветува чесна и интересна битка, во најмала рака, како што вели, дебата која нема никому да биде досадна, барем кога таа ќе презентира. - Најавив и останувам на тоа дека ќе бидам ед

– Јас знам дека нема потреба да ве убедувам. Ние сме една црвена армија која во среда ќе извојува победа. Јас програмата ја напишав толку рано што сите имаа можност да ја видат. Ја видоа и моите противкандидати, па почнаа да преземаат. Ете утре ќе имаат можност да дојдат на тенок мраз да видиме кој на што стои и да го бранат она што го раскажуваат деновиве, истакна Ванковска.

Кандидатот за претседател на ВЛЕН, Арбен Таравари заедно со лидерите на коалицијата ВЛЕН вчера одржале митинг со нашите сограѓани иселени во Цирих.

Кандидатот за претседател на ВЛЕН, Арбен Таравари заедно со лидерите на коалицијата ВЛЕН денеска одржаа митинг со нашите сограѓани иселени во Цирих.

– Македонија на овие избори се соочува со многу важен крстопат. Изборите се историски бидејќи основата на политичката трка на Македонија, ако ја поедноставиме, излегува дека е албинизмот наспроти вучизмот. Се наоѓаме во историски момент бидејќи по руската агресија во Украина, геостратегијата е целосно променета. Пред 3-4 недели имав можност да седнам со еден американски професор кој се занимава со геостратегија и тој многу убаво ми објасни некои работи со кои целосно се согласувам. Првиот триаголник е Скопје, Тирана и Приштина, а вториот триаголник, кој е многу важен за развој е Скопје, Софија и Атина. За среќа, имаме коректни односи со Приштина, а со Тирана треба да биде што е можно посилна соработката и во иднина треба да размислуваме што повеќе да ја развиеме соработката со Софија и Атина. Овие два триаголници го спречуваат влијанието на Северот, или на руското влијание, рекол Таравари во Цирих.

Таравари побарал поддршка од нашите сограѓани и истакна дека дијаспората е предводник на позитивните промени за Албанците во Македонија.

Извор: ЦивилМедиа.мк

Кандидатите за претседател сепак ќе се соочат утревечер на дебата на МРТ 1

Утревечер, на 21 април 2024 (недела) со почеток во 20 часот, на јавниот сервис МРТ 1 сепак ќе се одржи предизборно соочување на сите седуммина кандидати за претседател на Република Северна Македонија.

(ВИДЕО) На 24 април ТИ одлучуваш за иднината на земјата

Сега се одлучува за твојот живот во наредните 4 години. Премногу е во прашање да не учествуваме.

На 24 април ТИ одлучуваш за иднината на земјата.

Преземи обврска да гласаш https://actionnetwork.org/forms/glasaj

Инцијативата можете да ја следите на медиумската платформа на ЦИВИЛ и на социјалните мрежи:
X
Facebook
Instgram
TikTok
Youtube
За сè што сакате да знаете за изборите, ЦИВИЛ ја лансираше веб страницата ГЛАСАЈ.

ИЗБОРНА ХРОНИКА: Внатрешната блокада боли повеќе, Правда кога ќе дојдат вистински луѓе, Пред одлука за интеграција или изолација

Во последната недела пред претседателските избори, што ќе се одржат на 24 април(среда), кандидатите ја продолжуваат предизборната кампања.

Од несериозни ветувања, контрадикторни изјави и ставови, до тоа дека за неколку дена ќе одлучуваме дали сме за изолација или интеграција, пишува ЦИВИЛ Медоа во денешната изборна хроника.

ПРЕТСЕДАТЕЛСКИ ИЗБОРИ

Османи: Вашиот глас не е само еднократен избор, туку инвестиција за иднината

„За неколку дена ќе одлучите дали сме за интеграција или за изолација“ рече пред кумановци кандидатот за претседател на државата од Европскиот фронт, Бујар Османи.

Османи кажа дека ова е одлуката што треба да ја донесете со свои раце. Но, вашиот глас не е само еднократен избор. Туку е инвестиција за иднината. Инвестиција која ќе изгради ѕид против овој одмаздољубив национализам, кој може да се постави кај нас за неколку дена.

Османи вети дека ќе се посвети на градење држава во која, како што рече, секое дете ќе може да сонува без граници. 

Гордана Сиљановска: Aко Македонија не е горда, не може да биде ниту европска

„Се наближува 24-ти април, а по него и 8-ми мај, дојде моментот кога сакам да ви кажам дека токму на овие датуми ќе одлучите дали Македонија, како ТВОЈА и ГОРДА, навистина ќе биде проевропска, бидејќи ако Македонија не е горда, не може да биде ниту европска држава“ рече во Охрид кандидатката за претседател од ВМРО-ДПМНЕ, Гордана Силјановска Давкова.

Таа рече дека АСНОМ што ќе го славиме годинава, за неа ќе биде не антифашистичко, туку Антикоруптивно и антикриминално заседание на народното ослободување на Македонија од авторитарната власт.

Пендаровски: Повеќе боли внатрешната блокада на државата на нејзиниот пат кон ЕУ

“По 17 години со статус на земја кандидат за членство во ЕУ, сите ние, ова политичко раководство, со ваша поддршка ги отворивме преговорите, но се соочивме со две блокади, надворешната од соседна Бугарија, но и внатрешната блокада, којашто повеќе боли, од најголемата опозициска партија”, рече вечерва на предизборниот митинг во Кочани, претседателскиот кандидат Стево Пендаровски.

Во своето обраќање Пендаровски одговараше и на прашања од присутните на митингот, при што истакна дека останува на ставот дека е потребен ветинг во правосудството, но тоа да ги опфати и политичарите, неколку децении наназад.

Ванковска: Нас не’ не задоволува фотелја и позиција. Ние имаме кауза

„Посакувам да го изодиме овој пат борбено, чесно и доследно.Она што нас нѐ разликува од оние што трчаат на кратки патеки е тоа што ние трчаме маратон. Нас нѐ не задоволува фотелја и позиција. Ние имаме кауза“, рече пред граѓаните на Велес претседателскиот кандидат на Левица, Билјана Ванковска.

Посочи дека таа практично е единствена опозиција на оваа дебата. И како што кажа, таа и Левица бараат не реформа, туку радикална промена на се’ постоечко.

Димитриевски: Ќе има правда кога на вистинско место ќе дојдат одговорни луѓе

„Ќе има правда, тогаш кога на вистинско место ќе дојдат вистински, одговорни луѓе, бидејќи овие не само што нѐ лажеа, во целост нѐ прелажаа, па дури и од сопствениот народ се откажаа, од вредностите на Крушевскиот манифест и АСНОМ и од сè што е свето за Македонија и ако им дозволиме тоа ќе продолжат да го прават“, кажа кандидатот за претседател од движењето ЗНАМ, Максим Димитриевски.

Тој ги критикуваше политичките опоненти, ДУИ за која рече дека повеќе од две децении само ветувала, никогаш не изградила ниту фабрики, ниту метар од коридорот 8, и „околу прст ги врти“, и левите и десните.

Јакимовски: СДСМ и ВМРО ДПМНЕ водат ноевска политика

„СДСМ и ВМРО-ДПМНЕ водат ноевска политика, односно главата им е ставена во песок и на заканите и уцените од Османи и Таравари никако не одговараат“,  рече кандидатот за претседател од ГРОМ, Стевчо Јакимовски.

Тој ова го изјави како одговор на албанските партии за избор на претседател во Собранието и учество во Влада која ќе ги донесе уставните измени.

„Јас јавно ги прашувам дали ќе се одважат еднаш на овие уцени да одговорите со ваш одговор, а одговорот е дека ако има уцени за состав на Влада, ние ќе направиме широка коалиција меѓу ВМРО-ДПМНЕ, СДСМ и сите останати што сакаат да влезат во Влада“, рече Јакимовски.

ПАРЛАМЕНТАРНИ ИЗБОРИ

Кампањата за парламентарните избори, која почна вчера, продолжува денеска со активности на партиите и коалициите за претставување на изборните програми и кандидатите за пратеници во шесте изборни единици во земјава.

Коалицијата „Европска иднина“ предводена од СДСМ вчера ја стартуваше парламентарната кампања со настан „Нема откажување од иднината“ во Скопје, а имаше и митинзи во Демир Капија и во Гевгелија. Решителна и поефикасна борба против корупцијата, реформи во судството, повисоки плати и пензии, поддршка за младите, стопанството,.. најави претседателот на СДСМ, Димитар Ковачевски на стартот на кампањата за парламентарните избори.

ВМРО-ДПМНЕ и Коалицијата „Твоја Македонија“, пак, традиционално ја почнаа кампањата со митинг во Охрид.

Лидерот на ВМРО-ДПМНЕ, Христијан Мицкоски од Охрид на првиот ден од предизборната кампања за престојните парламентарни избори, порача дека партијата ќе води позитивна кампања, кампања на проекти, на надеж, и како што посочи, „кампања што ќе ја врати довербата на граѓаните во институциите“.

Претседателскиот кандидат на Левица, Билјана Ванковска ја претстави својата програма пред граѓаните на Велес. Пред присутните во салата на велешкиот театар се обратија и претседателот на Левица и носител на листата во ИЕ1 Димитар Апасиев, како и носителот на листата во ИЕ3, Борислав Крмов, кои токму од Велес ја почнаа својата промоција и кампања за пратеници во Собранието. Пред присутните се обрати Апасиев, според кого, нема револуција без поезија. Потенцира дека кампањата за парламентарните избори не случајно ја почнуваат од неговиот роден град, „Црвениот Велес, градот на Ганчо Хаџи Панзов и многу други борци меѓу кои и Коста Солев Рацин“.

Кандидатот за претседател од движењето ЗНАМ, Максим Димитриевски и носителите на листа од изборните единици вчера ја презентираа програмата „Проглас за достоинствена Македонија“ на митинг на градскиот плоштад во Куманово. Носителите на листи од изборните единици посочија дека најголем проблем за државата е корупцијата и ветија нејзино искоренување.

„Европскиот фронт“ предводен од Демократската Унија за интеграција вчера во Скопје одржа симулациска конститутивна седница на Собранието, со тоа, сликовито прикажувајќи што би се случувало ако победат на парламентарните избори. На оваа симулациска седница, едногласно со 120 гласа беа изгласани уставните измени согласно Договорот за добрососедски односи и уставните измени со кои претседателот на државата би се избрал во Собранието со двотретинско и Бадентерово мнозинство. На оваа седница беше инаугуриран Бујар Османи за шеф на државата.

Албанската опозициска коалиција „Вреди“ вчера во Скопје ги претстави носителите во сите шест изборни единици. Претседателскиот кандидат на „Вреди“, Арбен Таравари на прес-конференција рече дека на овие избори има целосно единство на албанската опозиција и тоа гарантира победа, бидејќи на сите избори, како што рече, мнозинството гласови ги имала опозицијата.

Извор: ЦивилМедиа

Аврамовска Мадиќ за TВ Клан: Без внесување на Бугарите во Уставот нема евроинтеграции, нема напредок во државата

Доколку сакаме да влеземе во ЕУ, Бугарите мора да влезат во Уставот за да можеме како држава да продолжиме по европскиот пат, рече заменик-министерката за правда, Викторија Аврамовска Мадиќ, говорејќи за уставните измени во КЛАН дебата со Љубиша Николовски.

„Мора да се отвори Уставот за да се отпочне со европската агенда. Без тоа нема евроинтеграции, нема напредок во државата. Ние, како држава го заштитивме идентитетот, македонскиот јазик и културата и сето она што е битно за една држава и мултиетничко општество. СДСМ изминатите 7 години покажа дека е државотворна партија. Секое натамошно дискутирање, прифаќање во кампањата на реални или нереални предлози за отворање на Уставот, може да се дискутира понатаму по формирањето на новата Влада и прифаќање на некои други промени во Уставот”, истакна Мадиќ.

Мадиќ смета дека доколку се отвори Уставот, тогаш може да се дискутира за повеќе прашања и барања на сите политички чинители, вклучувајќи ја на пример и препораката на ГРЕКО, министерот да не биде член по функција во Судскиот совет, прашањето со еврообврзницата, вакуумот за време на избори и друго.

Од друга страна, поранешниот пратеник и координатор на пратеничката група на ВМРО ДПМНЕ, Илија Димовски смета дека доколку се отвори Уставот, тогаш треба да се разговара и за други теми.

„Дали ќе се отвори Уставот формално, не знам, но дека треба да се разговара, треба да се разговара. За мене, на пример, примарно би било ако се отвори Уставот да се разговара за немањето потреба од Бадентерово мнозинство. Ние треба да ги изедначиме можностите за сите, да ги рекомпонираме позициите на претседателот на државата, да се тргне цензусот, да се зголемат надлежностите на претседателската функција, како контролор или балансер на извршната власт. За што и дали воопшто ќе се договориме, ќе покаже времето”, потенцираше Димовски.

Според него, приближувањето кон ЕУ не е унилатерален процес. Проблемот е што потребата за членство во ЕУ на Македонија не е созреана во ЕУ. Изговор е, вели Димовски, дека бугарскиот проблем е пречката за ЕУ. Тој тврди дека она што Бугарија ги наметна како билатерални прашања во мултиратералната преговарачка рамка е неразумно и е првпат во европската историја на проширувањето.

Политичкиот аналитичар, Сефер Селими порача дека во секое демократско општество е потребно да има континуирана цивилизациска дебата, особено кај политичките чинители.

„Некои прашања на политичарите се малку посензитивни. Двојното мнозинство не се однесува на законите поврзани со просто мнозинство. За внесувањето на Бугарите и други заедници во Уставот, тоа не е само услов од страна на албанските политички партии за создавање на Влада, туку тоа е европски услов за продолжување на процесот за интеграција. Тоа е најважниот процес кој се води во нашата држава, каде сите треба да се сплотиме. Мене ми е жал што тој процес се исполитизира и тука ќе изгубиме сите”, рече Селими.

Извор: КланМК

Поповски: Мицкоски е во очај штом нуди „веридба“ со Левица и формирање моноетничка Влада, што е исклучително опасно за Македонија

0

Аналитичарот и колумнист на Рацин.мк Тони Поповски, оценува дека Мицкоски изгледа е во очај штом нуди „веридба“ со Левица и формирање моноетничка Влада, што е исклучително опасно за Македонија.

До оваа констатација Поповски доаѓа по медиумскиот настап на Васко Наумовски и Ненад Марковиќ, професори на Правниот Факултет на УКИМ, во емисија на ТВ Телма.

„Одлична емисија со Наумовски и Марковиќ, колеги од Правниот факултет при УКИМ. Во еден момент Васко Наумовски, кој е ДПМНЕ но не е Орбановец, односно е доследен европски десничар и одличен аналитичар, прогнозира мала излезност, наспроти анкетите на Влајко и прогнозите на Николовски за излезност близу 60%“, посочува Поповски.

Врз основа на кажаното во емисијата, според Поповски, со мала излезност, можеби не како на претходните ковид избори, да речеме цирка 970 – 980 000, бројот на пратеници Албанци може да биде вкупно околу 27 и на ова надоврзани уште 3-4 пратеници во коалицијата на ДУИ, каде има две партии на Турците и по една на Ромите и Бошњаците, или тотал 30-31. Помалите партии како Левица (со капитал од 50к избирачи на локалните избори), ЗНАМ и коалицијата на Стевчо (заедно цирка 45 к) можат да дојдат до 10-11 пратеници. Остануваат цирка 80 пратеници за коалициите на ДПМНЕ и СДСМ, прогнозира Поповски.

Тој вели дека со тоа доѓаме до критична точка на која од двете коалиции граѓаните ќе ѝ дадат поголема поддршка.

Иако, според некои показатели, во моментов предничи поддршката за ДПМНЕ, Поповски посочува дека „повикот на ДПМНЕ за обединување со Левица и ЗНАМ е повик за создавање моноетничка влада, а таква влада и според Силјановска е опасен потфат со сериозни внатрешно политички ризици“.

Поповски во таа насока потсети на реакциите на симулацијата на ДУИ со партнерите како би изгледал моноетничкипт парламент според ниваната проекција.

„Но, овој повик кон Левица и ЗНАМ првенствено се случува поради математиката од погоре и поради настојувањето на Мицкоски по секоја цена да направи влада“, заклучува Поповски.

Поповски укажува дека „после интервјуто на Агелар, ВЛЕН конечно потврди дека нема да влезе во влада без претходно направени уставни измени“ и дополнува дека коалицијата на Таравари после овој повик за „веридба“ на ДПМНЕ со Левица, сега уште помалку ќе има интерес да партиципира, иако таквата „зделка“ е продуктивна во смисла на гласови за Силјановска во втор круг.

Поповски нагласува дека „повторно, непристрасно и чисто математички, единствени кои можат да состават продуктивна влада која нема да ја наруши внатрешната стабилност, се коалицијата на СДСМ, со двете коалиции на албански партии, и евентуално ЗНАМ, доколку ја смират кавгата во социјал-демократското семејство“.

„Во вакво сценарио, бидејќи ДПМНЕ нема да може да направи  влада, треба да се остави подотворена врата за реновирано про-европско, наспроти орбановската ДПМНЕ. Има силно крило во ДПМНЕ кое е на тие позиции. Таква широка влада на која опозиција би и била само Левица, треба и реално може да не внесе во ЕУ за 4 до најмногу 6 години од сега“, истакнува Поповски.

Поповски, врз основа на оваа анализа, укажува дека „сите непродуктивни кавги ќе се потиснат во позадина, и заедно ќе се изоди тој стратешки пат. Сѐ друго е вовед во нов циклус на загубени можности, но и можни сериозни компликации“.

Извор: Рацин

Трошановски: Претседателските избори се подготовка за парламентарните, во таа функција беа организирани и наративите и кампањата

„Очигледно е дека претседателските избори се подготовка за парламентарните избори и во таа функција беа и наративите и кампањата организирани, мерење на силите помеѓу партиите за да може понатаму да се позиционираат на кампањата којашто веќе почна за парламентарните избори“ рече Марко Трошановски од Институтот за демократија во утринската програма на „Слободен печат“.

Тој додаде дека двете главни теми на опозицијата се малку поимагинарни концепти на изгубено достоинство, враќање на државата во рацете на народот, гордоста којашто се претпоставува дека е изгубена, што според него го прави секоја опозиција која сака да се врати на власт.

Од друга страна, за париите од Власта, Трошаноски вели дека тие ветуваат уште подобар економски стандард од постигнатиот и побрзо чекорење кон Европската Унија.

„Тие себе се проектираат како носители на прогресивни стратешки политики од коишто сите ќе видиме аир за некоја година и сето тоа подразбира дека досега добро си ја завршиле работата, што беше коректно од една страна од страна на СДСМ, во неколку писма коишто ги видовме и признавање на дел од грешките коишто ги направија“, посочи Трошановски.

Според него, партиската битка во нашата држава е многу немилосрдна.

„Мислам дека нивото на партискиот менталитет, мало признание на грешка е одма знак на слабост, сите се многу внимателни на ниво на базичен инстинкт да не се исповедаат, да не се самокритични за да не наидат на канонада критики и тоа како општество ни прави голем проблем. Пред се затоа што треба да простуваме, а од друг аспект затоа што не можеме да создадеме заеднички именител на одговорност во ова општество кога никој не ја прифаќа вината на себе. Тогаш за ништо не можеме да се согласиме дека нешто е лошо или добро“, заклучи Трошановски.

Извор: СлободенПечат

Василевска: Да го искористиме фундаменталното човеково право на слобода на избор и да гласаме!

Новинарката Ана Василевска со порака: Да го исокристиме фундаменталното човеково право на слобода на избор и да излеземе да гласаме!

Василевска: Да го исокристиме фундаметалното човеково право на слобода на избор и да гласаме!
Придружете ни се и направете го вашиот план за гласање: https://actionnetwork.org/forms/glasaj
Инцијативата можете да ја следите на медиумската платформа на ЦИВИЛ и на социјалните мрежи:
X
Facebook
Instgram
TikTok
Youtube
За сè што сакате да знаете за изборите, ЦИВИЛ ја лансираше веб страницата ГЛАСАЈ.

Изборна хроника на Цивил: какви пораки упатија кандидатите на петнаесетиот ден од кампањата за претседателските избори

Кандидатите за претседател на државата продолжија со предизборната кампања за изборите што ќе се одржат на 24 април. Кандидатите во својот политички вокабулар се жалат дека нема соочување меѓу нив,  зборуваат за земјоделие, за децентрализацијата и дека сега е дојдено време за идејата за Евопскиот фронт.

ПРЕТСЕДАТЕЛСКИ ИЗБОРИ

Силјановска Давкова: Ниту сум била ниту сум против децентрализацијата

„Не, не бев јас против децентрализација и тогаш и сега сум за децентрализација ама бев против вештачката неприродна територијална организација.Преку ноќ без согласност на граѓаните, на локалните власти и без почитување на 33 референдума на локално ниво за задржување на статусот на општините, беше направен демографски и изборен инженеринг и беа вештачки придодадени селски средини на урбаните“, рече во Велес кандидатката за претседател на Коалицијата  „Твоја Македонија“ предводена од ВМРО-ДПМНЕ Гордана Силјановска Давкова.

Таа посочи дека „последиците ги гледаме и денеска што вештачки во некои градови, селото го управува градот и во некои градови се вратени феудалните односи“.

Пендаровски: Политичкиот реализам е дека без промена на Уставот нема напредок кон ЕУ

„Завчера имаше интервју на човек од германската ЦДУ, сестринска партија на ВМРО-ДПМНЕ кој дошол овде да им помогне и им вели овој е патот. Јас сакам да им кажам: Оставете ја кампањата, јасно ми е зошто го правите ова, бидејќи на тоа прашање добивате политички поени, на друго не добивате. Но, сега, дајте соочете се со овој нов политички реализам“ рече кандидатот за претседател  Стево Пендаровски во интервју за емисијата Топ Тема на ТВ Телма.

Пендаровски  наведува дека ВМРО-ДПМНЕ има и друга теза која вели „дајте ќе го промениме Уставот денес ама, промените ќе важат кога ќе станеме членки“ и прашува „дали тоа може да се направи и кој од европските фактори ви ветува дека такво нешто е можно“.

Таравари: Ќе ја вратиме некогашната репутација на Куманово и Липково

„Ќе го поврземе Куманово со Гњилане и Прешево, ќе инвестираме повеќе во агробизнисот, во грантови за земјоделците и во економски развој за да ја вратиме некогашната репутација на земјоделството и производството во регионот на Липково и Куманово“, речепретседателскиот кандидат на Коалицијата „Вреди“ Арбен Таравари на митинг во општина Липково.

Тој кажа дека општина Липково ја донесе ДУИ на власт, а како награда, општината, како што рече, добила само штета, неправда и лошо владеење.

Димитриевски: Граѓаните заслужуваат да видат кој – што нуди

„Господинот Пендаровски, а и госпоѓа Силјановска Давкова,  бегаат за жал од дебати и јавно ги повикувам да се соочиме на дебати, да ги извадиме нашите програми пред граѓаните, не поради нас, граѓаните тоа го заслжуваат“, рече во изјава за МРТ кандидатот за претседател од ЗНАМ Максим Димитриевски.

Во однос на предлозите за избор на претседателот на државата во Собранието тој рече дека  тоа директно го крши и Рамковниот, а и Уставот и едноставно во таа состојба ние немаме потреба од претседател на држава, ако се избира во Собранието.

Османи: Дојде времето за идејата на Европскиот фронт

„Тоа е одлична идеја чие време дојде, лавина што ги собра соништата на секој граѓанин на оваа земја, за еднаквост, за правда и просперитетен живот во ЕУ. И ова го гледам како ентузијазам, како насмевка во секое населено место каде што одам, бидејќи Европскиот фронт е трета унија, но сега со малку поинаква димензија“, рече кандидатот за претседател Бујар Османи на митинг во Кичево.

Кандидатот на Европскиот фронт, Османи понатаму истакна дека останува уште едена последна тврдина на етничкиот монопол.

„Тврдината која нè загрижува сите и секогаш ни го дава тој сигнал дека се уште не е сè како што треба, сè уште нема еднакви можности за сите, таа е тврдината на првиот претседател“, кажа Османи.

Јакимовски од Струга: Да престане нечесното играње кон Македонците

„Да престане со нечесното играње кон Македонците и да престане да се третираат како монета за поткусурување“, порача од Струга претседателскиот кандидат на ГРОМ Стевчо Јакимовски.

Тој забележа дека „лидерот на опозициската ВМРО – ДПМНЕ Христијан Мицкоски го лаже народот во врска со промената на Уставот, односно дека ќе поддржи промена со одложено дејство на важење кога ќе влеземе во Европската унија“.

ПАРЛАМЕНТАРНИ ИЗБОРИ

ПССЕ испраќа 14 набљудувачи на претседателските избори во Северна Македонија

Делегација од 14 набљудувачи на Парламентарното собрание на Советот на Европа (ПССЕ), предводена од Алфред Хер (Швајцарија, АЛДЕ), ќе ги следи претседателските избори во Северна Македонија на 24 април.

Делегацијата ќе ги следи изборите заедно со набљудувачите од Канцеларијата на ОБСЕ за демократски институции и човекови права (ОДИХР), соопшти ПССЕ.

Набљудувачите на ПССЕ ќе се сретнат со кандидатите кои се натпреваруваат на изборите, со претседателот и членовите на Државната изборна комисија, како и со претставници на граѓанското општество и медиумите.

Нема доволно пријави за парламентарните избори – дијаспората ќе гласа само за претседател

На претседателските избори вкупно 2571 државјани ќе може да гласаат во 31 ДКП Гласање на претседателските избори 2024 година, врз основа на прифатените 2571 пријави на наши државјани, ќе се спроведе во 31 дипломатско – конзуларно претставништво и конзуларни канцеларии на Северна Македонија во странство.

Државната изборна комисија (ДИК) објави дека гласање ќе има во Абу Даби каде се пријавени 26 наши државјани за гласање, во Белград-31, Берлин-260, Берн – 186, Бон – 164, Брисел -93, Вашингтон-34, Венеција – 79, Виена – 123, Детроит-34, Загреб-87, Канбера-31, Копехаген-74, Лондон-87, Љубљана-332, Минхен-166, Мелбурн-64, Њујорк-85, Осло-41, Париз-44, Прага-52, Рим-30, Стокхолм-85,Торонто-117,Хаг-65, Чикаго-88, Анкара-18, Варшава-23, Мадрид-18, Пекинг-12 и Софија 22. Останатите наши граѓани кои живеат во странство своето право на глас можат да го остварат во избирачките места во земјата.

Избори за пратеници нема да се спроведе имајќи предвид дека не беа пријавени доволен број граѓани кои скаат да гласаат. Пратениците се избираат и во изборната единица во странство според пропорционалниот модел, односно тука има уште еден услов како своевиден цензус. За да биде избран пратеник од Изборната единица 7 треба да освои најмалку онолкав број на гласови колку што освоил пратеник со најмал број на гласови на територијата на државата на последните парламентарни избори.

Училиштата каде што ќе се гласа на изборите, на 23 април и 7 мај ќе работат до 11 часот

Во вторниците 23 април и 7 мај, т.е. деновите пред одржувањето на изборите во државава, наставата во училиштата ќе се реализира вообичаено согласно распоредот, а училиштата во кои утредента ќе се организира гласање ќе работат од 7 до 11 часот, со скратени наставни часови за сите одделенија односно класови, соопшти Министерството за образование и наука.

Деновите на изборите, средите 24 април и 8 мај 2024, се неработни за сите училишта. МОН денеска во сопштение наведува дека и покрај овие два неработни дена, наставата од учебната 2023/2024 ќе се реализира во целост, како што предвидуваат плановите за организација на работата на основните и средните училишта.

Иванова: Секој поединец игра важна улога во градењето на еден систем со вистински вредности

Интервју со Дуња Иванова, спортиска, музичарка и граѓанска активистка, за важноста да се излезе и да се гласа!

Иванова: Секој поединец игра важна улога во градењето на еден систем со вистински вредности
Придружете ни се и направете го вашиот план за гласање: https://actionnetwork.org/forms/glasaj
Инцијативата можете да ја следите на медиумската платформа на ЦИВИЛ и на социјалните мрежи: 

За сè што сакате да знаете за изборите, ЦИВИЛ ја лансираше веб страницата ГЛАСАЈ.

Подготви: Назми Абдурахмани во соработка со ЦМТ.

Извор: ЦивилМедиа.мк

Зошто е важно Македонија што побрзо да стане членка на ЕУ?

Можности за брз развој и напредок и многу економски придобивки за Македонија ќе донесе членството во Европската унија.

Со зачленувањето во ЕУ, за македонската економија ќе се отворат вратите на единствениот европски пазар од 500 милиони потрошувачи.

Во тој голем пазар нашите компании ќе може да ги понудат и пласираат своите производи и услуги. Тоа дополнително ќе ги зајакне трговските перспективи и потенцијалите за остварување на одржливи стапки на раст на БДП.

Искуството на други држави покажува дека во првите 5 години од членствоот во Унијата, стапките на раст на БДП се зголемуваат од 80 до 90 отсто.

Поедноставената трговија веднаш ќе ги зголеми можностите за извоз и ќе создаде услови за намалување на трошоците и зголемување на ефикасноста на нашите компании.

Членството во ЕУ ќе овозможи и можност за слободно движење на работната сила во рамки на европскиот економски простор.

Процесот на приклучување кон ЕУ значи хармонизација на законодавството со европските норми и стандарди, што креира подобри услови за бизнис и инвестиции, европеизирање на македонскиот бизнис модел.

Исто така, ќе се создаваат реални услови за голем раст на платите, кој кај одредени држави во првите 5 години по зачленувањето во ЕУ се движел од над 50 отсто, па се до 100 отсто.

Ова ќе биде директна придобивка за куповната моќ за граѓаните, за нивниот смеен буџет и животен стандард.

Голема придобивка од членството во ЕУ ќе биде и пристапот до европските фондови, најмалку 10 милијарди евра за земјоделството, енергетиката, малите и средните претпријатија, инфраструктурата, образованието…

Извор: Центар